ASSAM TIMES POST
বকলীয়াঘাটঃ পৰিবেশ প্ৰদূষণকে ধৰি শেহতীয়াকৈ প্ৰাকৃতিক পৰিবেশৰ প্ৰতিকূলতাৰ বাবে পৃথিৱীৰপৰা দ্ৰুত হাৰত বিভিন্ন জীৱ বিলোপ হোৱাৰ সময়তে পশ্চিম কাৰ্বি আংলঙৰ এটা পাহাৰীয়া এলেকাত শেহতীয়াকৈ এক নতুন প্ৰজাতিৰ জীৱ আৱিষ্কাৰ কৰা হৈছে।
পশ্চিম কাৰ্বি আংলঙৰ খেৰণিৰ পৰা প্ৰায় ১৫ কিমি নিলগৰ লাংথাং নামৰ ভিতৰুৱা তথা পাহাৰীয়া গাঁৱখনত এই জীৱবিধৰ অস্তিত্বৰ কথা পোহৰলৈ আহিছে। জানিবপৰা মতে, লাংথাং গাঁৱৰ এঘৰ গৃহস্থীৰ ঘৰৰ বাহিৰত নিশা পেলাই ৰখা বাচনত বগাই থকা অৱস্থাত প্ৰথমে এই জীৱবিধ আৱিষ্কাৰ কৰা হয়৷ এই নতুন প্ৰজাতিৰ জীৱবিধ পূৰ্বে কোনেও দেখা নাছিল বুলি জানিব পৰা গৈছে।
আনহাতে, ডেৰমাহ ধৰি পানীভৰ্তি এটা বৈয়ামত আৱদ্ধ কৰি ৰখাৰ পাছতো এতিয়া পৰ্যন্ত জীৱটো পূৰ্বৰ দৰেই সক্ৰিয় হৈ থকা দেখিবলৈ পোৱা গৈছে। যাৰ বাবে ই অতিকৈ প্ৰতিকূল পৰিবেশৰ সৈতেও সহবাস কৰিব পৰাকৈ সক্ষম বুলি ধাৰণা কৰা হৈছে।
পশ্চিম কাৰ্বি আংলঙৰ বিশিষ্ট পৰিবেশ কৰ্মী তথা সাংবাদিক বীৰেন ইংহিৰ তৎপৰতাতহে বিষয়টো শেহতীয়াকৈ পোহৰলৈ আহে। প্ৰায় ৬/৮ ইঞ্চি দৈঘ্যৰ কেঁচু আকৃতিৰ তেনেই ক্ষুদ্ৰ প্ৰকৃতিৰ জীৱবিধক লৈ সাধাৰণ ৰাইজৰ মাজতো ব্যাপক উৎসুকতাৰ সৃষ্টি হৈছে। প্ৰাণীবিধ প্ৰত্যক্ষ কৰাৰ বাবেও গাঁওখনত বহু লোকে ভিৰ কৰা পৰিলক্ষিত হৈছে।
