ASSAM TIMES POST
ছাইদুল ইছলাম, ডিফুঃ ডিফু চহৰত এতিয়া ব্যৱসায়ীৰ নিদ্ৰাহৰণ কৰিছে এজাক শিশু চোৰে৷ শিশু চোৰৰ দলটোৱে চহৰখনৰ বিভিন্ন স্থানত হাতে-হাতে চিপৰাং, হাতুৰী আদিলৈ পিয়াপি দি ফুৰাটো সাধাৰণ ঘটনাত পৰিণত হৈছে৷
এইলৈ ডিফু আৰক্ষীৰো মূৰৰ কাঁমোৰণি বৃদ্ধি পাইছিল৷ বৃহস্পতিবাৰে পুঁৱতি নিশা ডিফু চহৰৰ মাজ-মজিয়াত এখন ম’বাইল ফোনৰ দোকানত চুৰি কাৰ্য সংঘটিত কৰি থকা সময়ত নৈশ টহলদাৰী আৰক্ষীৰ দলে এটা শিশু চোৰক আটক কৰিবলৈ সক্ষম হয় যদিও বাহিৰত ৰৈ চুৰি সামগ্ৰী সৰবৰাহ কৰি থকা আনদুটা শিশুচোৰ পলাই যাবলৈ সক্ষম হয়৷
এই সন্দৰ্ভত ডিফু চৰকাৰী বাছ আস্থানৰ কাষত থকা দেবনাথ ষ্ট’ৰ্ছৰ গৰাকী ৰাজু দেবনাথৰ ভাতৃ ৰুপম দেবনাথে ডিফু থানাত এজাহাৰ দাখিল কৰে৷ ডিফু থানাই এটা গোচৰ (নং:২১৯/১৯) ৰুজু কৰি তদন্ত অব্যাহত ৰখাৰ লগতে ধৃত চোৰটোক যোৰহাট শিশু কাৰাগাৰলৈ প্ৰেৰণ কৰা হৈছে বুলি জানিব পৰা গৈছে৷
