নগাঁও:
নগাঁও জিলাৰ নিকটৱৰ্তী ভেৰভেৰী নৰসিংহ ক্ষেত্ৰত নিৰ্মান সম্পূৰ্ণ হোৱা বিশ্বৰ সৰ্ববৃহৎ লিংগাকাৰ মহা মৃত্যুঞ্জয় মন্দিৰ দৰ্শন কৰি পূজা আগবঢ়াবৰ বাবে উপস্থিত হলহি দেশৰ গৃহ মন্ত্ৰী অমিত শ্বাহ।মূখ্যমন্ত্ৰী সৰ্বানন্দ সোনোৱাল আৰু মন্ত্ৰী ড: হিমন্ত বিশ্ব শৰ্মা,বি জে পিৰ ৰাজ্যিক সভাপতি ৰঞ্জিত কুমাৰ দাসক লগত লৈ মন্দিৰ প্ৰাংগণত উপস্থিত হৈ পোন প্ৰথমে গৃহমন্ত্ৰী গৰাকীয়ে প্ৰায় নিৰ্মান সম্পূৰ্ণ হৈ উঠা হোৱা বিশ্বৰ সৰ্ববৃহৎ মন্দিৰটো পৰিদৰ্শন কৰাৰ পিছতে মন্দিৰৰ কাষত থকা অস্থায়ী যজ্ঞ মন্দপত উপস্থিত হয়হি। উল্লেখযোগ্য যে অহা ২৭ ফেব্ৰুৱাৰীৰ পৰা ৫ মাৰ্চলৈ অনুষ্ঠিত হব লগা ১০৮ কুণ্ডৰ যজ্ঞ আৰু মন্দিৰৰ প্ৰাণ প্ৰতিষ্ঠা মহোৎসৱৰ বাবে ২২ ফেব্ৰুৱাৰীৰ পৰা চলি থকা মৃত্যুঞ্জয় ,জপ ,বেদপাঠ আৰু আহুতি প্ৰদান কাৰ্যসূচীত অংশগ্ৰহণ কৰে গৃহমন্ত্ৰী গৰাকীয়ে।ইয়াৰ পিছতে সাংবাদিকক সম্বোধন কৰি গৃহমন্ত্ৰী অমিত শ্বাহে কয় যে বাবা ভৃগুগিৰি মহাৰাজে এনে এটা মন্দিৰৰ সংকল্প কৰিছিল।
এই ভূমিত দৈত্য গুৰু শুক্ৰাচাৰ্যই মৃত্যুঞ্জই বিদ্যাৰ আবিস্কাৰ কৰিছিল।যাৰ পৰিপ্ৰেক্ষিতত বাবা ভৃগুগিৰি মহাৰাজে আবিস্কাৰ কৰাএই ভূমিত ১২৬ ফুটকৈ উচ্চতাৰ শিৱলিংগ আকৃতিৰ মন্দিৰৰ প্ৰাণ প্ৰতিষ্ঠা হোৱাৰ দিশত গতি কৰিছে।ভৃগুগিৰি মহাৰাজে এই ভূমি নিৰ্বাচন কৰিছিল আৰু মহা মৃত্যুঞ্জয় মন্দিৰ নিৰ্মানৰ বাবে সংকল্প লৈছিল বুলি কৈ কেন্দ্ৰীয় গৃহ মন্ত্ৰী গৰাকীয়ে আৰু কয় যে এই মন্দিৰটো সম্পূৰ্ণ হোৱাৰ বাবে অসম পুনৰ বিকাশৰ পথত গতি কৰিছে বুলি উল্লেখ কৰে। এটা সময়ত অসম আন্দোলন,হত্যা ,হিংসা আদিৰ বাবে জনাজাত আছিল বুলি উল্লেখ কৰি কেন্দ্ৰীয় গৃহমন্ত্ৰী গৰাকীয়ে কয় যে এই অসম এতিয়া বিকাশৰ পথত।অকল বিকাশেই নহয় উদ্যোগিক নিবেশ,শিক্ষা আদিৰ ক্ষেত্ৰতো পৰিবৰ্তন আহিল।প্ৰধানমন্ত্ৰী নৰেন্দ্ৰ মোডী ,মূখ্যমন্ত্ৰী সৰ্বানন্দ সোনোৱাল আৰু বিত্তমন্ত্ৰী ড: হিমন্ত বিশ্ব শৰ্মাৰ নেতৃত্বত বিজেপি নেতৃত্বাধীন চৰকাৰখনে পাঁচ বছৰত এক নতুন যুগৰ সুচনা কৰিলে।
এয়া প্ৰথম পদক্ষেপহে বুলি উল্লেখ কৰি অসমখনক দুস্কৃতি ,হিংসা আদিৰ পৰা মুক্ত কৰিব লাগিব বুলিও উল্লেখ কৰে।মহা মৃত্যুঞ্জয় যজ্ঞ আৰু মন্দিৰৰ প্ৰাণ প্ৰতিষ্ঠা সমাৰোহৰ কথা উল্লেখ কৰি গৃহ মন্ত্ৰী গৰাকীয়ে কয় এই শিৱলিংগ আকৃতিৰ মন্দিৰৰ প্ৰাণ প্ৰতিষ্ঠা হোৱাৰ পিছতে নিশ্চিত ভাৱে সমগ্ৰ অসম তথা ভাৰতবাসীৰ বাবে ভগৱান শিৱৰ আশীৰ্বাদ থাকিব।
