নিউজ ডেস্কঃ
নিজৰ প্রতিষ্ঠানৰ এগৰাকী কর্মচাৰীৰ সৈতে প্রেমৰ সম্পর্কত জড়িত হৈছিল বিল গেটছ। পত্নী মেলিন্ডাৰ সৈতে বিয়াত বহাৰ সেয়া ৬ বছৰ পিছৰ ঘটনা। মাইক্রোছফ্ট প্রতিষ্ঠাতাগৰাকী তেতিয়া নিজেও তেওঁৰ কেৰিয়াৰৰ শিখৰত। দুই দশকৰো আগৰ উক্ত ঘটনাত বিল গেটছৰ বিৰুদ্ধে তদন্ত আৰম্ভ কৰিছিল মাইক্রোছফ্ট কর্পৰেচনে। তাৰ ফলতেই আন্তর্জাতিক এই কোম্পানীৰ বোর্ডৰ পৰা আঁতৰিবলগা হয় বিল গেটছে। দেওবাৰে প্রকাশিত এটি আন্তর্জাতিক সংবাদ মাধ্যমৰ ৰিপোর্টত পোহৰলৈ আহিছে এই তথ্য।
আন্তর্জাতিক সংবাদ পত্র, ৱালষ্ট্ৰিট জার্নেলে তেওঁলোকৰ প্রতিবেদনত জনাইছে যে ঘটনাটি দুই দশকৰ পুৰণি হ’লেও মাইক্রোছফ্ট এই বিষয়ত অৱগত হয় ২০১৯ চনৰ শেষৰ ফালেহে। মাইক্রোছফ্টৰ এগৰাকী মহিলা প্রযুক্তিবিদে পত্ৰৰ জৰিয়তে সংস্থাটিক জনায়, বিলৰ সৈতে বহু বছৰৰ শাৰীৰিক সম্পর্কৰ কথা। এই বিষয়ত বিন্দুমাত্রও সময় নষ্ট নকৰি তেতিয়াই তদন্তৰ নির্দেশ দিছিল সংশ্লিষ্ট বোর্ডে। নিৰপেক্ষ বিচাৰত যাতে কোনো ধৰণৰ বুজাপৰা নহয় তাৰ বাবে গোচৰটিৰ দায়িত্ব মাইক্রোছফ্টৰ সৈতে জড়িত নথকা এটি আইনী সংস্থাক দায়িত্ব দিয়া হৈছিল। কিন্তু ইয়াৰ কিছুদিন পিছতেই বিল গেটছে তেওঁৰ পদৰ পৰা ইস্তফা দিয়ে। ফলত মাজপথতে থমকি ৰয় তদন্তও।
মাইক্রোছফ্টৰ প্রধান পদৰ পৰা বিলৰ ইস্তফাৰ কাৰণ যে এনে ধৰণৰ এটি অভিযোগ, সেয়া পূৰ্বতেই জানিছিল এক আন্তর্জাতিক সংবাদ সংস্থাই। বিষয়টি প্রকাশ্যে আনি তেওঁলোকে কৈছিল, বিলৰ এই সম্পর্কক অনৈতিক বুলি ৰায় দিয়ে মাইক্রোছর্টৰ বিষয়াসকলে। তাৰ বাবেই বিল গেটছে পদত্যাগ কৰিবলৈ বাধ্য হৈছিল। অৱশ্যে গেটছে তেতিয়া পদত্যাগৰ অন্য কাৰণ দেখুৱাইছিল। মাইক্রোছফ্ট প্রতিষ্ঠাতাগৰাকীয়ে জনাইছিল, এইবাৰ সমাজ কল্যাণমূলক কামত মনোযোগ দিব বিচাৰে তেওঁ। দেওবাৰে প্রকাশিত প্রতিবেদনত ৱালষ্ট্ৰিট জার্নেলত বিল গেটছৰেই এগৰাকী মুখপাত্রই নিজৰ নাম প্রকাশ নকৰাৰ চর্তত জনাইছে, দুই দশক আগতে বিল গেটছ এনে এটি প্রেমৰ সম্পর্কত জড়িত হৈ পৰিছিল। কিন্তু সেয়া শেষ হৈছিল বন্ধুত্বপূর্ণভাবে, দুয়ো পক্ষৰ সন্মতিতেই।
