ষ্টাফ ৰিপ’ৰ্টাৰ
কৰিমগঞ্জ সদৰ আৰক্ষীয়ে ড্ৰাগছ মাফিয়াৰ বিৰুদ্ধে চলাই থকা অভিযানত ব্যাপক সফলতা। আৰক্ষীৰ অভিযানত জব্দ কৰা হয় বৃহৎ পৰিমাণৰ নিচাযুক্ত টেবলেট৷ এই নিষিদ্ধ নিচাযুক্ত টেবলেটৰ নাম হৈছে ইয়াবা টেবলেট। কৰিমগঞ্জ আৰক্ষীৰ ড্ৰাগছবিৰোধী অভিযানৰ বিশেষ দল এটাই এক গোপন সূত্ৰৰ পমখেদি চলোৱা অভিযানত এই ড্ৰাগছখিনি জবাদ কৰিবলৈ সক্ষম হয়৷ কৰিমগঞ্জৰ পৰা কিছু দূৰৈৰ চৰিফনগৰত এএছ-১১-এইচ-২০৭৩ নম্বৰৰ এখন বলেৰোৰ পৰা জব্দ কৰে লক্ষাধিক ইয়াবা টেবলেট৷
জানিব পৰা মতে উক্ত ড্ৰাগছখিনিৰ বজাৰ মূল্য হ’ব এক কোটিৰো অধিক। ড্ৰাগছখিনিৰ লগতে আৰক্ষীৰ অভিযানত আটক হয় চাৰিজন ড্ৰাগছ ব্যৱসায়ীও। ইয়াৰে মাজৰ তিনিজন গুলছান আহমেদ, আব্দুল মুনিম, আব্দুল মজিদ বুলি জানিব পৰা গৈছে।
উল্লেখ্য, কৰিমগঞ্জ জিলা আৰক্ষী প্ৰশাসন শেহতীয়াভাৱে ড্ৰাগছ মাফিয়াৰ বিৰুদ্ধে অধিক কঠোৰ হোৱা পৰিলক্ষিত হৈছে। প্ৰতিদিনাই জিলাখনৰ আৰক্ষী প্ৰশাসনে ড্ৰাগছ চক্ৰ উৎখাত কৰাৰ বাবে বিশেষ একোটা দল গঠন কৰি কঠোৰ ব্যৱস্থা হাতত লৈছে।
