ষ্টাফ ৰিপ’ৰ্টাৰ
ডিফু : কাল কৰ’নাৰ বাবে ৰাজ্যজুৰি সৃষ্টি হোৱা মিনি লকডাউনৰ বাবে লাখ-লাখ নিবনুৱা যুৱক-যুৱতীয়ে কৰ্মস্থান হেৰুৱাৰ লগতে আন একাংশই কৰ্ম সংস্থাপন বিচাৰি চৌদিশে হাঁহাকাৰ কৰি থকাৰ সময়তে কাৰবি আংলং জিলাৰ এগৰাকী উদ্যমী মহিলাই নিবনুৱাসকলৰ বাবে কঢ়িয়াই আনিছে আশাৰ ৰেঙণি ৷ ডিফু-মাঞ্জা পথ ৭ মাইলৰ ওচৰৰ ৰংকাংথিৰত বিশুদ্ধ খোৱা পানীৰ বাবে মহিলাগৰাকীয়ে শুভাৰম্ভ কৰিছে “লংচৰ মিনাৰেল ৱাটাৰ” নামৰ এক উদ্যোগ ৷
আজি কাৰবি আংলং জিলা স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে “লংচৰ মিনাৰেল ৱাটাৰ” উদ্যোগটোৰ আধাৰ শিলাৰ শুভ উদ্ধোধন কৰে ৷ মুখ্য কাৰ্যবাহী সদস্যগৰাকীৰ লগত বিধায়ক বিদ্যাচিং ইংলেঙ, দৰচিং ৰংহাঙ ইএম অমৰচিং তিচ’ৰ লগতে কেইবাগৰাকী এমএচি উদ্ধোধনী কাৰ্যসূচীত অংশগ্ৰহণ কৰে ৷
সাংবাদিকৰে সৈতে হোৱা বাৰ্তালাপত উদ্যোগটোৰ স্বত্বাধিকাৰী তথা উদ্যমী মহিলা মুন ইংতিপিয় কয় যে, জিলাখনত সৃষ্টি হৈ অহা নিবনুৱা সমস্যা আৰু বেকাৰ যুৱক-যুৱতীৰ সমস্যাৰ প্ৰতি লক্ষ্য ৰাখিয়েই তেওঁৰ মনলৈ এনে উদ্যোগ আৰম্ভ কৰাৰ মনলৈ আহিছে ৷ সেই মহান উদ্দেশ্য আগত ৰাখিয়েই ১২ কোটি টকা ব্যয় সাপেক্ষে ডিফুৰ ৭ মাইলস্থিত ৰংকাংথিৰত ৯ বিঘা মাটি কালীত এই উদ্যোগ আৰম্ভ কৰাৰ প্ৰচেষ্টা লোৱা হৈছে ৷ ইয়াৰ বাবে বেংকৰ পৰা যাৱতীয় লোণ লোৱাৰ প্ৰক্ৰিয়া আৰম্ভ কৰা হৈছে বুলি কয় ৷
আনহাতে পৰিষদৰ মুখ্য কাৰ্যবাহী সদস্য তুলিৰাম ৰংহাঙে সাংবাদিকৰ আগত কয় যে মুন ইংতিপীৰ প্ৰচেষ্টা এক মহান প্ৰচেষ্টা ৷ ইয়াৰ জৰিয়তে জিলাখনৰ নিবণুৱা যুৱক-যুৱতীসকল উপকৃত হ’ব ৷
