ছাইদুল ইছলাম
ডিফু : ৰাজ্যৰ স্বায়ত্তশাসিত জিলা পৰিষদৰ ক্ষমতা ৰাজ্য চৰকাৰৰ হাতলৈ ঘূৰাই নিয়াৰ আশংকাৰ দৰে এক বিষয়লৈ জাঙুৰ খাই উঠিছে এপিএইছএলচি ৷ শেহতীয়াকৈ বিটিচিয়ে এক নিৰ্দেশনা যোগে বিটিচিৰ ক্ষমতা জিলা উপায়ুক্তলৈ হস্তান্তৰ কৰা ঘটনা তীব্ৰ বিৰোধিতা কাৰবি আংলঙৰ বিৰোধী ৰাজনৈতিক দল এপিএইছএলচিয়ে ৷
আজি বিয়লি ডিফুস্থিত জিলা প্ৰেছ ক্লাৱত এক সংবাদমেলৰ আয়োজন কৰি দলটোৰ সভাপতি জে আই কাথাৰে এনে এক নিৰ্দেশনাকলৈ অসন্তুষ্টি প্ৰকাশ কৰি স্বায়ত্তশাসনৰ ক্ষমতা ৰাজ্য চৰকাৰৰ হাতত অৰ্পণ কৰা হৈছে বুলি অভিযোগ কৰে ৷ বিটিচিৰ অনুকৰণত কাৰবি আংলং আৰু ডিমা হাচাওত স্বায়ত্তশাসিত পৰিষদতো এই নীতি প্ৰযোজ্য হৈ যাব পাৰে বুলি আশংকা প্ৰকাশ কৰিছে নেতাগৰাকীয়ে ৷ উপায়ুক্ত, আৰু আৰক্ষী অধীক্ষকগৰাকী ৰাজ্য চৰকাৰৰ ক্ৰমে, সাধাৰণ প্ৰশাসন আৰু গৃহ বিভাগৰ ব্যক্তি হোৱাৰ পৰিপ্ৰেক্ষিতত স্বায়ত্তশাসনৰ ক্ষমতা প্ৰদান বিষয়টো উপায়ুক্তৰ হাতত দিয়া কাৰ্য সম্পূৰণ স্বায়ত্তশাসনৰ ক্ষমতা ৰাজ্য চৰকাৰক অৰ্পণ কৰা বুজায় বুলি কয় নেতাগৰাকীয়ে ৷ পৰিষদৰ মুখ্য কাৰ্যবাহী সদস্য আৰু সদস্যসকল দূৰ্নীতি গ্ৰস্থ হোৱা বাবে এনে পদক্ষেপ গ্ৰহণ কৰা বুলি উল্লেখ কৰি পৰিষদৰ বিষয়ববীয়াইও এই কথা স্বীকাৰ কৰাৰ দৰে হোৱা বুলি মন্তব্য কৰে নেতাজনে ৷
আনহাতে পৰিষদৰ নেতৃবৰ্গকো দুৰ্নীতিমুক্তভাবে কাম কৰি যাবলৈ আহ্বান জনাই আৰৱ বিটিচি মডেল গ্ৰহণ নকৰিবলৈ কাৰবি আংলঙ স্বায়ত্তশাসিত পৰিষদৰ মুখ্য কাৰ্যবাহী সদস্যক আহ্বান জনায় এপিএইছএলচিয়ে ৷ এই সন্দৰ্ভত এপিএইছএলচি আৰু ডিমাছা নেশ্যনেল কাউঞ্চিলে যৌথভাৱে ডিফু আৰু হাফলঙত দুয়োখন স্বায়ত্তশাসিত পৰিষদৰ মুখ্য কাৰ্যবাহী সদস্যৰ হাতত স্মাৰক পত্ৰ প্ৰদান কৰে বুলিও সংবাদ মেলত প্ৰকাশ কৰে নেতাগৰাকীয়ে ৷
