ASSAM TIMES POST
ছাইদুল ইছলাম, ডিফুঃ কাৰ্বি আংলঙৰ বনাঞ্চলত খনিজজাত সামগ্ৰীৰ অবৈধ খনন আৰু সৰবৰাহকলৈ সৰব হৈ পৰিছে সন্মিলিত কাৰ্বি আংলঙ জিলা ছাত্ৰ পৰিষদ চমুকৈ উছুকাই৷
আজি সংবাদ মাধ্যমলৈ প্ৰেৰণ কৰা এক প্ৰেছ বিবৃতিত উছুকাৰ কেন্দ্ৰীয় সমিতিৰ সাধাৰণ সম্পাদক জিণ্টু হাজৰিকাই অভিযোগ উত্থাপন কৰে যে একাংশ ৰাজনৈতিক নেতাৰ পৃষ্ঠপোষকতাত জিলাখনৰ বনজ সম্পদৰ অবাধ খনন আৰু সৰবৰাহ অব্যাহত আছে৷
এই ক্ষেত্ৰত বনকৰ্মী, বিষয়া সকলো জড়িত থকা বুলি সন্দেহ প্ৰকাশ কৰিছে ছাত্ৰ সংগঠনটোৱে৷ পাৰ্বত্য উন্নয়ন মন্ত্ৰী ছুম ৰংহাঙে বনজ সম্পদ সমূহৰ অবৈধ খনন আৰু সৰবৰাহ বন্ধ কৰিবলৈ নিৰ্দেশ প্ৰদান কৰাৰ পিছতো অবাধ হাৰত খনন আৰু সৰবাৰাহ চলি থকাটো অতিশয় পৰিতাপৰ বিষয় বুলি উল্লেখ কৰে নেতাগৰাকীয়ে৷
বনজ সম্পদৰ অবৈধ খনন আৰু সৰবৰাহ বন্ধ নকৰিলে উছুকাই অনাগত দিনত তীব্ৰ গণতান্ত্ৰিক আন্দোলন গঢ়ি তোলা হ’ব বুলি বিবৃতি যোগে হুংকাৰ দিছে৷
