অজন্তা তালুকদাৰ
বোকাখাত : গোলাঘাট জিলাৰ নৱ-নিযুক্ত উপায়ুক্ত মৃগেশ নাৰায়ন বৰুৱাৰ উপস্থিতিত সংবাদকর্মীসকলৰ সৈতে আজি বোকাখাত মহকুমাধিপতিৰ কাৰ্য্যালয়ৰ সভাকক্ষত মহকুমাটোৰ কোভিড-১৯ৰ বৰ্তমানৰ পৰিস্থিতিৰ সন্দৰ্ভত এখনি পৰ্যালোচনা সভা অনুষ্ঠিত হয়। সভাত বোকাখাতৰ মহকুমাধিপতি বিপুল দাসে মহকুমাটোৰ কোভিড-১৯ৰ সকলোবোৰ তথ্য সাঙুৰি এখনি পাৱাৰ পইণ্ট প্রতিবেদন প্রদর্শণ কৰে। উল্লেখ্য যে, মহকুমাটোত বর্তমান মাইক্রকনটেইণমেণ্ট জন আছে ৭ টা। ১৪ জুলাইলৈকে মহকুমাটোত ৪৫ বছৰৰ উৰ্ধ্বৰ মুঠ ২৩,৫৯৮ গৰাকী লোকক আৰু ১৮ৰ পৰা ৪৪ বছৰ বয়সৰ মুঠ ২৫,৮৪৮ গৰাকী লোকক কোভিড প্রতিষেধক প্রদান কৰা হৈছে।
আনহাতে মহকুমাটোত ব্যাপক হাৰত কোভিডৰ পৰীক্ষণ চলাই থকা হৈছে। আজিৰ সভাত সাংবাদিকৰ সৈতে হোৱা মত বিনিময়ত উপায়ুক্তগৰাকীয়ে জিলাখনত কোভিড পৰিস্থিতি কিছু উন্নত হোৱা বুলি উল্লেখ কৰি তিনিদিনৰ বাবে গেলামালৰ দোকান, খুচুৰা বিক্ৰী কেন্দ্র, শাক-পাচলি তথা ফলমূলৰ দোকান সম্পূর্ণ বন্ধ ৰখাৰ নিৰ্দেশনা আৰু বৃদ্ধি কৰা নহয় বুলি উল্লেখ কৰে। কিন্তু কোভিড ১৯ সংক্রান্তত অসম চৰকাৰে জাৰি কৰা সকলো নীতি-নির্দেশনা জিলাখনত সম্পূৰ্ণৰূপে বলবৎ থাকিব বুলি কয়।
আনহাতে আগন্তক দিনত বোকাখাতৰ লগতে সমগ্ৰ জিলাখনৰ কোভিড ১৯ৰ সম্পূর্ণ পৰিস্থিতিৰ নজৰ ৰখাৰ লগতে বিশ্লেষণ কৰা হ’ব বুলিও জানিবলৈ দিয়ে। সভাতে উপায়ুক্তগৰাকীয়ে মহকুমাটোৰ বিভিন্ন স্থানত গঢ় লৈ উঠা অবৈধ চুলাই মদৰ ঘাটিসমূহ সম্পূর্ণভাৱে উচ্ছেদ কৰিবৰ বাবে আবকাৰী বিভাগক তৎপৰ হ’বলৈ নিৰ্দেশ দিয়ে। ইয়াৰ লগতে চাহ বাগিচাসমূহত বাহিৰৰ পৰা অস্থায়ী কৰ্মচাৰী অনা নিয়াৰ ক্ষেত্রত মহকুমা প্ৰশাসনক তীক্ষ্ণ দৃষ্টি ৰাখিবলৈ নির্দেশ দিয়ে। সমগ্ৰ জিলাখনত যাতে সম্পূর্ণ লক-ডাউনৰ পৰিস্থিতিৰ সৃষ্টি নহয় তাৰ বাবে সকলো ৰাইজক সজাগ হোৱাৰ লগতে কোভিডৰ নীতি নির্দেশনাসমূহ কঠোৰভাবে পালন কৰিবলৈ আহ্বান জনায়। সভাত গোলাঘাট জিলাৰ অতিৰিক্ত উপায়ুক্ত কুলদ্বীপ হাজৰিকা, বোকাখাতৰ মহকুমা স্বাস্থ্য বিষয়া ডাঃ ভাৰত ফুকন, আবকাৰী উপ অধীক্ষক দেৱজ্যোতি দেউৰী, খণ্ড উন্নয়ন বিষয়া দিলীপ চৰকাৰ, অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱা, বোকাখাত মহকুমা সাংবাদিক সংস্থাৰ সম্পাদক নীলু আচাৰ্য, বিশিষ্ট সমাজকৰ্মী দেৱপ্ৰদীপ বৰা প্ৰমুখ্যে বোকাখাতৰ বিশিষ্ট ব্যক্তিসকল উপস্থিত থাকে। সভাৰ পাছতে সাংবাদিকে সোধা প্ৰশ্নৰ উত্তৰত উপায়ুক্তগৰাকীয়ে কয় যে গোলাঘাট জিলাখনত পুনৰাই সম্পূৰ্ণ লক-ডাউন ঘোষণা কৰা নহ’ব। কিন্তু সংক্ৰমন ঘটিলে চুবুৰী একোটা মাইক্ৰকণ্টেইণমেণ্ট জ’ন হিচাপে ঘোষণা কৰা হ’ব। গোলাঘাট জিলা অদ্যপি ৰঙা জ’নত থকাৰ বাবে গেলামালৰ বাহিৰে আন ব্যৱসায় প্ৰতিষ্ঠান খোলাৰ অৱকাশ নাই বুলি প্ৰকাশ কৰে উপায়ুক্ত বৰুৱাই। লগতে তেওঁ কয় যে বোকাখাতত বৰ্তমান কভিডৰ হাৰ চাৰি শতাংশৰ সমীপত চলি আছে যদিও বিগত কেইসপ্তাহ ধৰি ক্ৰমাগতভাৱে কভিড আক্ৰান্তৰ সংখ্যা কমি আহিছে।
কিন্তু চিন্তাৰ বিষয় যে কেইটামান অঞ্চলত নতুনকৈ কভিডাক্ৰান্তৰ সংখ্যা বৃদ্ধি পাইছে। গতিকে তেনে অঞ্চলসমূহত সম্পূৰ্ণৰূপে কভিড পৰীক্ষাৰ ব্যৱস্থা কৰা হ’ব আৰু ভেক্সিনৰ যোগান নিয়মীয়া কৰা হ’ব। লগতে আজিৰ দিনটো ধৰি বিগত তিনিদিন গণসংক্ৰমন ৰোধৰ স্বাৰ্থত সমগ্ৰ গোলাঘাট জিলাত গেলামাল, পাইকাৰী আৰু শাক-পাচলিৰ দোকানো জিলা প্ৰশাসনৰ নিৰ্দেশ মৰ্মে বন্ধ আছিল। এই সম্পূৰ্ণ লক-ডাউন আজি সমাপ্ত হ’ল আৰু কাইলৈৰ পৰা ৰাজ্য চৰকাৰৰ পৰা অহা নতুন এচ অ’ পি মৰ্মে জিলাখনত লক-ডাউনৰ ব্যৱস্থা পৰিচালিত হ’ব। সাধাৰণ লোকৰ সুবিধাৰ্থে গেলামাল আৰু শাক-পাচলিৰ দোকানসমূহ খোলাৰ ক্ষেত্ৰত কেনে ব্যৱস্থা গ্ৰহণ কৰা হ’ব বুলি সাংবাদিকে সোধা প্ৰশ্নৰ উত্তৰত উপায়ুক্তগৰাকীয়ে কয় যে গেলামাল আৰু শাক-পাচলিৰ দোকানসমূহ বিভিন্ন মহলৰ পৰা
অহা পৰামৰ্শৰ ওপৰত ভিত্তি কৰি দিনৰ ২ বজালৈকে খোলা ৰখাৰ জিলা ভিত্তিক সিদ্ধান্ত লোৱাৰ সম্ভাৱনাৰ কথা দোহাৰে। গোস্বামীয়ে সাংবাদিকক আৰু জানিবলৈ দিয়ে যে চৰকাৰৰ নিৰ্দেশনা মৰ্মে মাইক্ৰকণ্টেইণমেণ্ট জ’নসমূহত খাদ্য সামগ্ৰী দৰিদ্ৰ সীমাৰেখাৰ তলৰ লোক বা খাদ্য সামগ্ৰীৰ যোগানে ঢুকি নোপোৱা লোকক প্ৰদান কৰাৰ নিয়ম আছে যদিও মহকুমাসমূহত মহকুমাধিপতিয়ে পৰিস্থিতি সাপেক্ষে নিজা সিদ্ধান্ত লোৱাৰ স্বাধীনতা আছে। উপায়ুক্তগৰাকীয়ে সংবাদ প্ৰকাশৰ জড়িয়তে সংবাদকৰ্মীসকলে ৰাইজক কভিড সন্দৰ্ভত যি সজাগতা আগবঢ়াইছে তাৰ বাবে সংবাদকৰ্মীসকললৈ ধন্যবাদ আৰু শলাগ জনায়।
