ASSAM TIMES POST
ডিফুঃ কাৰ্বি আংলং জিলাৰ মাঞ্জা আৰক্ষীৰ বৃহৎ সফলতা ৷ প্ৰত্যাশিত ভাবে কাৰ্বি আংলঙ জিলাৰ মাঞ্জা আৰু ডিলাইৰ দৰে এলেকাক একাংশ দূৰ্ধৰ্ষ গাড়ীচোৰে নিৰাপদ কৰিডৰ হিচাপে ব্যৱহাৰ কৰি অহাৰ পিছত শেহতীয়াকৈ মাঞ্জা আৰক্ষীৰ তৎপৰতাত দৰঙ জিলাৰ পৰা চুৰি কৰি অনা দুই গভাইত গাড়ী চোৰক গাড়ী সহ আটক কৰিবলৈ সক্ষম হয় আৰক্ষী ৷
ঘটনাৰ বিৱৰণি অনুসৰি দৰঙ জিলাৰ দেওমৰণৈ ৰান্ধনি সত্ৰ গাওঁ নিবাসী তথা দৰঙ জিলা সাহিত্য সভাৰ প্ৰাক্তন সভাপতি ভাৰত ভূষণ মহন্তৰ নিজা ঘৰৰ পৰাই কালি পুৱতি নিশা এএছ ১৩ জি ৮০১৭ নম্বৰৰ ছুইফ্ট ডিজায়াৰ গাড়ীখন চুৰি কৰি নিয়ে ৷
সাধাৰণতে আন্তঃৰাজ্যিক চুৰি গাড়ীৰ বিক্ৰী কেন্দ্ৰ হিচাপে চৰ্চিত হোৱা নাগালেণ্ডৰ ডিমাপুৰত গাড়ীচোৰৰ দলটোৱে গাড়ীটো বিক্ৰি কৰিবলৈ আনে ৷ এক বিশেষ সুত্ৰৰ পমখেদি কালি সন্ধিয়া প্ৰায় ৭ মান বজাত মাঞ্জা থানাৰ ভাৰপ্ৰাপ্ত বিষয়া জিতুমনি ডেকাৰ নেতত্বত এটা অভিযানকাৰী দলে অভিযান চলাই চুৰি হোৱা গাড়ী সহ দুই দূৰ্ধৰ্ষ গাড়ী চোৰক জালত পেলাবলৈ সক্ষম হয় ৷
ধৃত গাড়ীচোৰ দুটা দৰঙ জিলাৰ মঙলদৈৰ নিজদহি বণিয়াপাৰা গাঁৱৰ সুৰজ বণিয়াৰ পুত্ৰ পৱন বণিয়া ( ২৩) আৰু একে জিলাৰ মঙলদৈৰ বৰখটৰা গাওঁ নিবাসী লাভাৰ কলিতাৰ পুত্ৰ ভৱেশ কলিতা (২০) বুলি চিনাক্ত কৰা হৈছে ৷ আৰক্ষীৰ এই বৃহৎ সফলতাক সচেতন মহলে শলাগ লৈছে ৷
