ডিফুত গান্ধী জয়ন্তীৰ পৱিত্ৰ ক্ষণত ৫৪ গৰাকী চাফাই কৰ্মীক সম্বৰ্ধনা

ছাইদুল ইছলাম

ডিফু : উত্তৰ-পূৰ্বাঞ্চলৰ ভিতৰত পাহাৰীয়া জিলাৰ সদৰ চহৰ ডিফুৱে আটাইতকৈ পৰিষ্কাৰ চহৰৰ স্বীকৃতি লাভ কৰাৰ ক্ষেত্ৰত ডিফু মিউনিচিপালটি বোৰ্ডৰ চাফাই কৰ্মচাৰী অভূতপূৰ্ব অৰিহণাৰ বাবে ১৫২ সংখ্যক গান্ধী জয়ন্তীৰ প্ৰাকক্ষণত যথোচিত সন্মান প্ৰদৰ্শনেৰে পোন প্ৰথমবাৰৰ বাবে কাৰবি পহ’ আৰু মানপত্ৰৰে সম্বৰ্ধনা জ্ঞাপন কৰা হয় ৷

কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ডিফু মিউনিচিপালটি বোৰ্ডে “আজাদী কা অমৃত মহোৎসৱ”ৰ লগত সংগতি ৰাখি ডিফু গান্ধী পাৰ্কত আয়োজন কৰা এক গাম্ভীৰ্যপূৰ্ণ অনুষ্ঠানত ৫৪ গৰাকী চাফাই কৰ্মীক এই সন্মান প্ৰদান কৰে ৷
ইয়াৰ পূৰ্বে CEM তুলিৰাম ৰংহাঙ, স্থানীয় বিধায়ক আৰু এমএচি তথা কাৰ্যবাহী সদস্য ক্ৰমে বিদ্যাচিং ইংলেং আৰু ৰতন টেৰণ, এমএচি ৰিচাৰ্ড টকবী, ডিফু মিউনিচিপালটি বোৰ্ডৰ অধ্যক্ষ ৰাহ ক্ৰ’ কেইবাগৰাকী ৱাৰ্ড কমিচনাৰ আৰু বিষয়া কৰ্মচাৰীসকলে মহাত্মী গান্ধীৰ প্ৰতিমূৰ্তিত পুষ্পাঞ্জলী আৰু ধূপ-ধুনাৰে গভীৰ শ্ৰদ্ধাঞ্জলী জ্ঞাপন কৰে ৷

সাংবাদিকৰ সৈতে হোৱা বাৰ্তালাপত কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী যদস্য তুলিৰাম ৰংহাঙে কয় যে, ডিফু মিউনিচিপালটি বোৰ্ডৰ দক্ষতা আৰু বিচক্ষণতাৰ বাবে ডিফু চহৰখন উত্তৰ-পূৰ্বাঞ্চলৰ ভিতৰত শ্ৰেষ্ঠ চহৰৰ স্বীকৃতি লাভ কৰিবলৈ সক্ষম হৈছে ৷ এতিয়া ভাৰতৰ ভিতৰতে অন্যতম শ্ৰেষ্ঠ পৰিষ্কাৰ চহৰ হিচাপে সন্মান লাভ কৰিবলৈ লক্ষ্য লোৱা হৈছে ৷ ডিফু চহৰৰ চুকে-কোণে ষ্ট্ৰীট লাইট বিদ্যুত সৌৰচাকি আৰু বিভিন্ন উন্নয়ণমূলক কাম কৰি যোৱাৰ বাবে টীম কাৰবি আংলঙে সংকল্প লৈছে ৷ চাফাই কৰ্মীসকলক আজি প্ৰদান কৰা পহ’ আৰু মানপত্ৰৰ বাবে তেওঁ সুখী বুলি মন্তব্য কৰে ৷