নিউজ ডেস্কঃ
‘জানিত্ৰী’ত আমি হৃদয় উদযাপন কৰোঁ আৰু আমাৰ ভিতৰৰ আত্মাক সন্মান কৰোঁ। সেয়ে হৃদয় আৰু আত্মাৰে ধুনীয়া প্ৰতিজন ব্যক্তিক ‘জানিত্ৰী’য়ে গুৰুত্ব দি আহিছে৷ ‘জানিত্ৰী’ৰ মূল উদ্দেশ্য হৈছে প্ৰতিজন ব্যক্তিৰ মাজত লুকাই থকা ‘প্ৰকৃতি মাতৃ’ক জগাই তোলা৷ ‘জানিত্ৰী’ হৈছে সাধাৰণ লোকসকলৰ বাবে এনে এখন মঞ্চ যি এতিয়াও সমাজৰ বৃহত্তৰ কল্যাণত অৰিহণা যোগাবলৈ আগবাঢ়ি অহাৰ ইতিবাচক দিশত বিশ্বাস কৰে৷
‘অসম মমপ্ৰেনিয়াৰৰ সভা’খন ২১ নৱেম্বৰ, দেওবাৰে সন্ধিয়া ছয় বজাৰ লগে লগে ভাৰ্চুৱেল মাধ্যমৰ দ্বাৰা আৰম্ভ কৰা হয়৷অনুষ্ঠানটো ‘মহিলা সবলীকৰণ’ নামৰ এটি মনোজ্ঞ ভিডিঅ’ৰ দ্বাৰা উদ্বোধন কৰা হয় আৰু তাৰ পিছতেই ৰুমি বৰাই ‘জানিত্ৰী’ৰ মূল উদ্দেশ্য আৰু লক্ষ্য সম্পৰ্কে বক্তব্য আগবঢ়ায়৷ লগতে উত্তৰ-পূবৰ মহিলা উদ্যোগীসকলে সন্মুখীন হোৱা প্ৰত্যাহ্বানৰ বিষয়ে তেখেতে অৱগত কৰায়৷ ড৹ শ্ৰীপৰ্ণভূঞা বৰুৱাৰ দ্বাৰা ‘আপোনাৰ ষ্টাৰ্টআপ কেনেদৰে শক্তিশালী কৰি ৰাখিব পাৰি’, লগতে মহিলা উদ্যোগীৰ পৰিসৰ আৰু সুযোগৰ বিষয়ে আলোচনা কৰা হয়৷ ডাঃ ভাচাভি আচাৰ্য আৰু যূতিকা মহন্তই মহিলাসকলক প্ৰত্যাহ্বান জনোৱাৰ বাবে তেওঁলোকৰ ব্যৱহাৰিক অভিজ্ঞতাৰ দ্বাৰা জানিবলৈ দিয়ে৷
মিন্টলাইমৰ ৰুমী বৰাই কয় যে, মাতৃ শব্দটোৰ মাজত পবিত্ৰ প্ৰেম আৰু অসীম শক্তিৰ উৎস নিহিত হৈ আছে৷ যি শক্তিয়ে সম্ভাৱনাৰ বীজ ৰোপণ কৰে৷ ‘জানিত্ৰী’ৰ সপোন হৈছে মাতৃসকলৰ কাষলৈ যোৱা আৰু সুখী মাতৃৰ বৃহৎ সম্প্ৰদায় সৃষ্টি কৰা৷ ফিজিঅথেৰাপিষ্ট ড৹ শক্তি মিশ্ৰই কয়- “প্ৰতিগৰাকী মাতৃয়েই সুস্থ আৰু শক্তিশালী হোৱাৰ যোগ্য। এগৰাকী মাতৃ হৈছে সমাজ আৰু ঘৰখনৰ প্ৰেম, গুণ আৰু স্তম্ভৰ প্ৰতীক। সেয়েহে তেওঁ শাৰীৰিকভাৱে সক্ৰিয় আৰু আৱেগিকভাৱে সতৰ্ক হোৱা প্ৰয়োজন যাতে সকলো প্ৰত্যাহ্বানৰ সন্মুখীন হয়। সমাজৰ মাতৃসকলৰ লগত সংযোগ স্থাপনৰ উদ্দেশ্যে কাম কৰি থকা এই উদ্যোগটোৰ অংশ হ’বলৈ পাই মই সুখী৷”
লেখিকা মৌচুমী বৰিয়ে কয়, “পৃথিৱীৰ আটাইতকৈ মধুৰ শব্দ ‘মা’৷এগৰাকী মাতৃ এখন ঘৰৰ সূৰ্যস্বৰূপা৷ মাতৃ এগৰাকীয়ে আৱৰি ৰাখে এখন ঘৰ৷ হৃদয়ৰ উমাল নিভাঁজ মৰমৰ পৰশেৰে সন্তানক ডাঙৰ-দীঘল কৰে৷ সন্তানৰ শাৰীৰিক, মানসিক, বৌদ্ধিক বিকাশৰ ক্ষেত্ৰত মাতৃগৰাকীৰ ভূমিকা অপৰিসীম৷ কৰোনা অতিমাৰীৰ এনে এক দিঃসময়ত উঠি অহা ল’ৰা-ছোৱালীৰ শিক্ষা-দীক্ষা, জীৱন-ধাৰণ সকলো ক্ষেত্ৰতে প্ৰত্যাহ্বান আহি পৰিছে৷ গতিকে এই সময়ত অভিভাৱকৰ ভূমিকা অপৰিসীম৷ সন্তানক সঠিক দিগদৰ্শন কৰিবলৈ অভিভাৱকসকল সচেতন হোৱা উচিত৷ এইসময়ত মাতৃগৰাকীয়ে সন্তানক বিভিন্ন সৃষ্টিমূলক কামত ব্যস্ত ৰাখিব পাৰে৷ সন্তানৰ মাজত থকা প্ৰতিভা উলিয়াই আনিবলৈ যত্ন কৰিব পাৰে৷ অনলাইন মাধ্যমযোগে অনুষ্ঠিত হোৱা ব্যক্তিত্ব বিকাশ আদি অনুষ্ঠানত ভাগ ল’বলৈ উৎসাহিত কৰিব পাৰে৷ গছ, চৰাই, আকাশৰ স’তে পৰিচয় কৰাই দি প্ৰকৃতিৰ স’তে একাত্ম হ’বলৈও শিকাব পাৰে৷”
‘জানিত্ৰী’ হৈছে এখনি মাতৃ হৃদয় কঢ়িয়াই ফুৰা সকলো মাতৃ তথা ব্যক্তিকে ইজনে সিজনৰ সৈতে যোগাযোগ ৰাখিব পৰাকৈ, সহৃদয় মত বিনিময়ৰ জৰিয়তে ইজনে সিজনক সমৰ্থন কৰাৰ বাবে এক শক্তিশালী মঞ্চ প্ৰদান কৰা আৰু এই পৃথিৱীখনত বাস কৰিবৰ বাবে এক সুন্দৰ স্থান হিচাপে গঢ়ি তুলিবলৈ প্ৰেম আৰু দয়া বিয়পোৱা।
এই মঞ্চখনৰ দ্বাৰা মহীয়সী মাতৃসকলক সহায়, সমৰ্থন আৰু অনুপ্ৰেৰণাৰে উদ্বুদ্ধ কৰা হ’ব৷ তেখেতসকলক বয়স, শিক্ষা আৰু দক্ষতাৰে আগবঢ়াই নিয়াৰ প্ৰয়াস কৰা হ’ব আৰু ‘জানিত্ৰী’য়ে মাতৃসকলৰ ঘৰ আৰু সমাজৰ বাবে আগবঢ়োৱা প্ৰেম আৰু আত্মত্যাগক অন্তঃকৰণেৰে অভিবাদন জনাব৷ এই পদক্ষেপটো ‘মিণ্টলাইম’ৰ এটা অংশ, যি হৈছে সমগ্ৰ বিশ্বৰ সৃষ্টিশীল আৰু উদ্ভাৱনী মনক সমৰ্থন কৰাৰ এক মঞ্চ।
