ছাইদুল ইছলাম
ডিফু : মঙলবাৰে ডিফুস্থিত অত্যাধুনিক ‘কাছা’ খেলপথাৰত অনুষ্ঠিত ১৩ সংখ্যক কাছা কাপ ফুটবল চেম্পীয়ণশ্বীপৰ চূড়ান্ত বিজয়ীৰ খিতাপ অৰ্জন কৰে কাৰবি আংলং মৰ্ণিং ষ্টাৰ এফ চিএ ৷ তীব্ৰ প্ৰতিদ্বন্ধিতামূলক চূড়ান্তখেলত নিৰ্দ্ধাৰিত সময়ৰ ভিতৰত কাৰবি আংলং মৰ্ণিং ষ্টাৰ ক্লাৱ এফচি নিজৰ স্বভাৱ সুলভ খেল প্ৰদৰ্শন কৰি ক্লিৰদাপ এফচিক ৩-১ গ’লত পৰাজিত কৰি চেম্পীয়ণ ট্ৰফী লাভ কৰিবলৈ সক্ষম হয় ৷
প্ৰাপ্ত তথ্য অনুসৰি খেলৰ প্ৰথমাৰ্ধত ১৭ মিনিটত ক্লিৰদাপ এফচিৰ হৈ এডউইন টপ্পৱে মৰ্ণিং ষ্টাৰ এফচিৰ বিৰুদ্ধে ১ গ’ল দি দলক ১-০-ৰ অগ্ৰগতি প্ৰদান কৰে ৷ তাৰ পিছত কাৰবি আংলং মৰ্ণিং ষ্টাৰ এফচিৰ হৈ বিশাল গুৰুঙে ৪১ মিনিটত ক্লিৰদাপ এফচি এটা গ’ল দি সমতা স্থাপন কৰে ৷ তাৰ পিছত মৰ্ণিং ষ্টাৰৰ হৈ দেউৰী ক্ৰ’ই দ্বিতীয়টো গ’লদি মৰ্ণিং ষ্টাৰক ২-১ৰ অগ্ৰগতি প্ৰদান কৰে ৷
ইয়াৰ পিছত খেলৰ দ্বিতীয়াৰ্দ্ধৰ ৫৩ মিনটিত মৰ্ণিং ষ্টাৰ এফচিৰ হৈ এইছ মিংলু ৱাংকালে ক্লিৰদাপ এফচিৰ নেটত তৃতীয়টো গ’ল সুমুৱাই কাৰবি আংলং মৰ্ণিং ষ্টাৰ এফচিক ৩-১-ৰ ব্যৱধানত পৰাজিত কৰি বিজয়ী খিতাপ লাভ কৰিবলৈ সক্ষম হয় ৷ শ্ৰেষ্ঠ গ’ল ৰক্ষকৰ সন্মান পায় ক্লিৰদাপ এফচিৰ ৰোহিত ৰংহাঙ, শ্ৰেষ্ঠ স্ক’ৰাৰৰ সন্মান লাভ কৰে কাৰবি আংলং মৰ্ণিং ষ্টাৰ এফচিৰ বিশাল গুৰুঙে আৰু চেম্পীয়ণশ্বীপৰ শ্ৰেষ্ঠ খেলুৱৈৰ বঁটা লাভ কৰে কাৰবি আংলং মৰ্ণিং ষ্টাৰ এফচিৰ দেউৰী ক্ৰ’ৱে ৷ খেলখন পৰিচালনা কৰে বাজ’ তিচ’ৱে ৷ তেওঁক লাইনত সহায় কৰে ক্ৰমে, আৰ উইনচন কিলিঙ, আৰু হনচিং কিলিঙে ৷ চতুৰ্থ ৰেফাৰীৰ দায়িত্বত থাকে কণ্টিনচন হাঞ্চে ৷ বঁটা বিতৰণী সভাৰ অতিথি হিচাপে উপস্থিত থাকে কাৰবি আংলং স্বায়ত্তশাসিত পৰিষদৰ কাৰ্যবাহী সদস্য জীৱন পাঠক ‘কাছা’ৰ সাধাৰণ সম্পাদক পংকজ টেৰণ, জিলা ক্ৰীড়া বিষয়া ৰিলিফ ৰংহাঙ, ডিফু মিউনিচিপালটি বোৰ্ডৰ উপাধ্যক্ষ মীৰা তিচ’পী, ইএম অমৰচিং তিচ’ৰ মাতৃ কাজক ইংতিপি ৷
