বোকাখাতৰ ধোদাং ৰশ্মি ৰেখা শিল্পী সমাজৰ উদ্যোগত, সন্মিলিত যুৱক সংঘ তথা ধোদাং বাসী ৰাইজৰ সহযোগত ৬ জানুৱাৰীৰ পৰা ৬ ফেব্ৰুৱাৰীলৈ এমহীয়া শিশু নাট কৰ্মশালাৰ অন্তত যোৱা ৬ ফেব্ৰুৱাৰীৰ সন্ধ্যা তিনিকুৰি শিশুৱে মঞ্চস্থ কৰিলে নাট্যকাৰ পবিত্র ৰাজখোৱাৰ শিশুনাট ‘মাৰফৎ বকুলতল’।
উদীয়মান যুৱ নাট পৰিচালক তৰুণ তীৰ্থ শইকীয়াৰ পৰিচালনাত ধোদাং বিষ্ণু জ্যোতি কলা নিকেতনৰ প্ৰেক্ষাগৃহত মঞ্চস্থ হোৱা শিশু নাটকখৰনিৰ শিল্পী সকলে দৰ্শক ৰাইজৰ মন আকৰ্ষিত কৰিবলৈ সক্ষম হ’ল। তৰুন তীৰ্থ শইকীয়াৰ লগতে শিশুনাট কৰ্মশালাৰ প্ৰশিক্ষক সকল আছিল ক্ৰমে প্ৰনৱ শইকীয়া, প্ৰিয়াংশু প্ৰাঞ্জল আৰু নিলীম ফুকন।
সংগীতত তন্ময় শইকীয়া আৰু জিতুমনী কটকী শব্দ, পোহৰত আছিল মুন। নাট্য সন্ধ্যাটি উদ্বোধন কৰে ৩ নং মহুৰা জিলা পৰিষদৰ সদস্য তথা গোলাঘাট জিলা পৰিষদৰ উপ সভানেত্রী ৰশ্মি কাকতিয়ে। নাট্য সন্ধ্যাৰ প্ৰাক মুহূৰ্তত কুকীল কন্ঠী গায়িকা লতা মাংগেশকাৰৰ বিয়োগত গভীৰ শোক প্ৰকাশ কৰি শ্ৰদ্ধাঞ্জলি জ্ঞাপন কৰা হয়।
উল্লেখ্য যে কৰ্মশালাটোত শিশু সকলক নাটক আৰু ব্যৱহাৰিক জীৱনত কামত অহাকৈ কথন শৈলী , আবৃত্তি , মুখা শিল্প , মঞ্চ সজ্জা , ৰূপসজ্জা আদি বিষয়তো প্ৰশিক্ষণ দিয়া হয়।
নাটকৰ শেষত কন কন শিশু শিল্পী সকলৰ লগত নাট্য প্ৰশিক্ষক, নাট্যকাৰ আৰু দৰ্শক ৰাইজৰ মাজত এঘন্টীয়া এটি অন্তৰংগ আলাপ অনুষ্ঠান সম্পাদিত কৰে বিশিষ্ট নাট্যকৰ্মী তথা সাংবাদিক প্ৰদীপ কুমাৰ বৰাই। প্ৰতিগৰাকী প্ৰশিক্ষাৰ্থীক একোখনকৈ মানপত্ৰ প্ৰদান কৰাৰ লগতে প্ৰশিক্ষাৰ্থী সকলে গুৰু প্ৰনাম অনুষ্ঠানো সম্পাদন কৰে।
ধোদাং ৰশ্মিৰেখা শিল্পী সমাজ তথা সন্মিলিত যুৱক সংঘৰ শিল্পী সকলে অহা ১২ ফেব্ৰুৱাৰীত শংকৰ জ্যোতি নাট্য মন্দিৰত আন এক নাট্য নিবেদন “অজলা ককাইৰ পগলা মৰম” আগবঢ়াব বুলি জানিবলৈ দিছে।
