ASSAM TIMES POST
উৎপল দাস, গোলাঘাটঃ ৰাষ্ট্ৰীয় শিক্ষাৰ্থী বাহিনী চমুকৈ এনচিচিৰ ৭৪ আছাম গাৰ্লছ বাহিনীৰ উদ্যোগত গান্ধী জয়ন্তী উপলক্ষে ডনবস্ক’ কলেজ গোলাঘাটত এখনি তৰ্ক প্ৰতিযোগিতা অনুষ্ঠিত কৰা হয়। প্ৰতিযোগিতাৰ আৰম্ভণিতে ৰাষ্ট্ৰীয় শিক্ষাৰ্থী বাহিনীৰ কেডেটসকলে আদৰণি গীত পৰিৱেশন কৰে আৰু আদৰণি ভাষণ প্ৰদান কৰে জেনী বাৰ্লাই আৰু উপস্থিত সকলোকে আদৰণি জনায় ডনবস্ক’ কলেজৰ উপাধ্যক্ষ ফাদাৰ বিমলে।
তৰ্ক প্ৰতিযোগিতাখনৰ বিষয় আছিল মহাত্মা গান্ধীৰ আদৰ্শ সমূহ বৰ্তমানেও প্ৰাসংগিক হৈ আছে। মুঠ ১৪ গৰাকী তাৰ্কিকে উক্ত প্ৰতিযোগিতাত অংশ গ্ৰহণ কৰে। অনুষ্ঠানত মুখ্য অতিথি ৰূপে উপস্থিত থাকে ৭৪ এনচিচি গাৰ্লছৰ কমাণ্ডিং অফিচাৰ কৰ্নেল এচ কে মিশ্ৰ। তেওঁ গান্ধীজীৰ আদৰ্শ সমূহ সাম্প্ৰতিক সময়ত অতি প্ৰাসংগিক হৈ থকা বুলি মন্তব্য কৰি সেই আদৰ্শ সমূহ সঠিক ধৰণে আগুৱাই নিয়াৰ ক্ষেত্রত আমাৰ দায়িত্ব আছে বুলি মত পোষণ কৰে।
লগতে তেওঁ স্বচ্ছ ভাৰত অভিযান এক সবল আন্দোলন যি আমাৰ সমাজ তথা দেশখনৰ উত্তৰণৰ বাবে অতি প্ৰয়োজনীয় বুলি মন্তব্য কৰে। তৰ্ক প্ৰতিযোগিতাত বিষয়বস্তুৰ সপক্ষে যুক্তি দিয়া শ্বাম্মা কৌছৰৰ দল বিজয়ী হয়। প্ৰতিযোগিতাত বিচাৰকৰ আসনত আছিল ক্ৰমে মুকুল শৰ্মা, বিজিত শইকীয়া আৰু প্ৰবীণ হাজৰিকা। অনুষ্ঠানৰ শেষত শলাগৰ শৰাই আগবঢ়ায় আমিন টপ্পই।
