পেৰোলত ৰেহাই পাইছিল ধর্ষণৰ শাস্তিপ্রাপ্ত আচামী। পেৰোলৰ ম্যাদ শেষ হোৱাৰ পিছতো জে’ললৈ উভতি ন’গৈ পলাই ফুৰি আছিল। দিল্লীত ভুৱা পৰিচয়েৰে ৩৩ বছৰ কটোৱাৰ পিছত অৱশেষত মঙ্গলবাৰে আৰক্ষীৰ জালত ধৰা পৰে আচামী ৰঘুনন্দন সিং।
ৰঘুনন্দন উত্তৰ প্রদেশৰ হাথৰসৰ বাসিন্দা। পুৰণি এটি ধর্ষণৰ ঘটনাত জে’ল খাটিছিল ৰঘুনন্দনে। পত্নীক লৈ দিল্লীত ভুৱা পৰিচয়েৰে আছিল। আত্মীয়সকলে ভাবিছিল ৰঘুনন্দনৰ মৃত্যু হোৱা বুলি। কিন্তু মঙ্গলবাৰে হঠাৎ তেওঁৰ আৱির্ভাৱত স্তম্ভিত হৈ পৰে ৰঘুনন্দনৰ আত্মীয়সকল। আনকি বিস্ময় প্রকাশ কৰে গাঁওবাসীয়েও।
হাথৰসৰ আৰক্ষী অধীক্ষক বিনীত জায়ছোৱালে সংবাদ সংস্থা পিটিআইক জনাইছে, ১৯৮৬ চনত হাথৰসত এটি ধর্ষণৰ ঘটনাত অভিযুক্ত হৈছিল ৰঘুনন্দন। ১৯৮৭ত দোষী সাব্যস্ত হয়। স্থানীয় আদালতে ৰঘুনন্দনক যাৱজ্জীৱন কাৰাদণ্ড বিহে।
১৯৮৯ চনত এলাহাবাদ হাইকোর্টত আবেদন জনায়। আদালতে ৰঘুনন্দনৰ পেৰোলত মুক্তিৰ আবেদন মঞ্জুৰ কৰে।
সেই সুযোগককেই কামত লগাই ৰঘুনন্দনে তেওঁৰ ঘৰ-বাৰী, সম্পত্তি সকলো বিক্ৰী কৰি গাঁও এৰি পলাই যায়।
নতুন পৰিচয়েৰে দিল্লীৰ বুৰাৰিত গৈ আশ্রয় লয়। তাত এখন কাপোৰৰ দোকানত ভুৱা পৰিচয়েৰে কাম কৰে। ইফালে পেৰোলৰ ম্যাদ শেষ হৈ যোৱাতো আচামী ৰঘুনন্দন জে’ললৈ ঘূৰি নোযোৱাত হাইকোর্টৰ দ্বাৰস্থ হয় আৰক্ষী। তেতিয়াই হাইকোৰ্টে ৰঘুনন্দনক গ্রেপ্তাৰৰ নির্দেশ দিয়ে।
