অস্ত্ৰ আইনৰ অধীনত গ্ৰেপ্তাৰ কাৰ্বি আংলং চেম্বাৰ অফ কমাৰ্চৰ অধ্যক্ষ আগষ্টিন ক্ৰামছা

ASSAM TIMES POST

ছাইদুল ইছলাম, ডিফু: অস্ত্ৰ আইনৰ অধীনত আজি গ্ৰেপ্তাৰ হৈছে কাৰবি আংলঙ চেম্বাৰ অফ কমাৰ্চৰ অধ্যক্ষ আগষ্টিন ক্ৰামছা ৷

আৰক্ষীৰ সূত্ৰে জানিব পৰা অনুসৰি আজি পুৱতি নিশা ডিফু থানা এলেকাধীন ডিফু লামডিং পথৰ মিজুংদিছাৰ পৰা গ্ৰেপ্তাৰ কৰা হয় আগষ্টিন ক্ৰামছাক ৷

আৰক্ষীৰ সুত্ৰৰ অনুসৰি বালিজান আৰু নাহৰজান অসম নাগালেণ্ড সীমামূৰীয়া এলেকাৰ জনসাধাৰণক আগষ্টিন ক্ৰামছাই লগত নগা যুৱক আৰু অস্ত্ৰলৈ ভয়- ভাবুকি প্ৰদান কৰা বুলি এজাহাৰ লাভ কৰে, আৰু উক্ত এজাহাৰৰ ভিত্তিত ডিলাই থানাত 37/2019 নম্বৰত এক গোছৰ ৰুজো দি ভা:দ:বি আইনৰ অধীনত 120(B),447/506/387/109, R/W sec 25(1-A) অস্ত্ৰ আইনত তদন্ত আৰম্ভ কৰে ৷

এইলৈ যোৱা নিশা ডিলাই থানাৰ অ’চি ৰঞ্জিত হাজৰিকাৰ নেতৃত্বত আৰু ডিফু থানাৰ আৰক্ষীৰ সহযোগত ডিফুত আগষ্টিন ক্ৰামছাৰ সন্ধান চলাই ব্যৰ্থ হয় যদিও অভিযানকাৰী দলটোৱে ডিফু -লামডিং পথৰ মিজুংদিছাৰ পথত পোহৰ দেখি পাই খাপ পিটি ৰয় আৰু তাতে এখন স্কুটিত আহি থকা অৱস্থাত আগষ্টিন ক্ৰামছাক গ্ৰেপ্তাৰ কৰিবলৈ সক্ষম হয় আৰক্ষীয়ে ৷

বৰ্তমান গ্ৰেপ্তাৰবৰণ কৰা চেম্বাৰ অফ কমাৰ্ছৰ অধ্যক্ষ গৰাকীক আৰক্ষীয়ে জেৰা অব্যাহত ৰাখিছে বুলি জানিব পৰা গৈছে ৷