অহা ২৮ এপ্ৰিলত দেশৰ প্ৰধান মন্ত্ৰী নৰেন্দ্ৰ মোডীয়ে কাৰ্বি আংলং জিলাৰ লৰিনথেপিত এখন ৰাজহুৱা সভাত অংশগ্ৰহণ কৰিবলগীয়া কাৰ্যসূচীক কেন্দ্ৰ কৰি সমগ্ৰ জিলাখনতে ব্যাপক প্ৰস্তুতি অব্যাহত থকাৰ সময়তে স্বায়ত্বশাসিত ৰাজ্যৰ দাবী প্ৰসংগক লৈ সৰৱ হৈ পৰিছে পাহাৰীয় জিলাকেইখনৰ আঞ্চলিক ৰাজনৈতিক দল এএছডিচি।
আজি ডিফুত এক সংবাদমেলৰ আয়োজন কৰি পাহাৰীয়া জিলাকেইখনৰ দীৰ্ঘদিনীয়া ৰাজনৈতিক দাবীক লৈ পুনৰ সৰৱ হৈ পৰে দলটোৰ সভাপতি-সম্পাদক ক্ৰমে চন্দ্ৰকান্ত তেৰাং আৰু জৎচন বে’। আজি বিয়লি ডিফুত এক সংবাদমেলৰ আয়োজন কৰি দলটোৰ নেতৃবৰ্গই ১৯৭১ চনতে পাহাৰীয়া এলেকাটোৱে স্বায়ত্বশাসিত ৰাজ্যৰ মৰ্যাদা লাভৰ সুযোগ হেৰুৱাবলগীয়া হোৱা বুলি মন্তব্য কৰে।
লগতে বিগত সময়চোৱাত বিভিন্ন সময়ত নিৰ্বাচনৰ সময়ত বিজেপি দলৰ কেন্দ্ৰীয় নেতৃত্বই কাৰ্বি অসমৰ পাহাৰীয়া জিলাকেইখনক সামৰি এখন স্বায়ত্তশাসিত ৰাজ্য গঠনৰ দাবীক মান্যতা দিয়াৰ দাবীৰ কথা পুনৰ উনুকীয়াই দিয়ে।
নেতৃবৰ্গৰ দাবী অনুসৰি,২০০৯ চনত খেৰণিৰ এক সভাত তেতিয়াৰ উপ-প্ৰধানমন্ত্ৰী লালকৃষ্ণ আদৱানি, ইয়াৰ পিছত ডকমকাত অনুষ্ঠিত হোৱা এক ৰাজহুৱা সভাত তেতিয়াৰ বিজেপিৰ ৰাষ্ট্ৰীয় সভাপতি ৰাজনাথ সিঙে বিজেপি দলে চৰকাৰ গঠন কৰিবলৈ সক্ষম হ’লে স্বায়ত্বশাসিত ৰাজ্যৰ দাবীক বিবেচনা কৰাৰ প্ৰতিশ্ৰুতি প্ৰদান কৰিছিল।
ইয়াৰ উপৰিও ২০১৬ চনৰ বৈঠালাংছ’ বিধানসভা সমষ্টিৰ উপ-নিৰ্বাচন, ২০১৭ চনৰ কাৰ্বি আংলং স্বায়ত্বশাসিত পৰিষদৰ নিৰ্বাচন আৰু ২০১৯ চনৰ দেশৰ সাধাৰণ নিৰ্বাচনতো বিজেপিৰ নিৰ্বাচনী ইস্তাহাৰত স্বায়ত্বশাসিত ৰাজ্যৰ দাবীক স্থান দিয়া হৈছিল।
ইয়াৰ উপৰিও বিজেপি দলৰ সাধাৰণ সম্পাদক তথা সাংসদ তাপিৰ গাওৱে এক পত্ৰযোগে কাৰ্বি আংলং আৰু ডিমা হাছাও জিলাক সামৰি এখন স্বায়ত্তশাসিত ৰাজ্য গঠন কৰাৰ প্ৰতিশ্ৰুতি প্ৰদান কৰিছিল।
ইয়াৰ পিছতো আজি পৰ্যন্ত এই দীৰ্ঘদিনীয়া সাংবাদিক প্ৰত্যাশা পূৰণ কৰাৰ ক্ষেত্ৰত চৰকাৰে কোনো যোগাত্মক পদক্ষেপ গ্ৰহণ নকৰিলে বুলি মন্তব্য কৰি প্ৰধানমন্ত্ৰীগৰাকীৰ কাৰ্বি আংলং ভ্ৰমণৰ সময়তে বিভিন্ন সময়ত বিজেপি দলে দি অহা প্ৰতিশ্ৰুতিৰ প্ৰতি সন্মান জনাই পাহাৰীয়া জিলাকেইখনক সামৰি এখন স্বায়ত্তশাসিত ৰাজ্য গঠন কৰাৰ কথা ঘোষণা কৰাৰ বাবে সংবাদমেলযোগে আহ্বান জনায়। ইয়াক অন্যথা দলটোৰ প্ৰকৃত স্বৰূপ মুকলি হৈ পৰিব বুলি দলটোৱে মত প্ৰকাশ কৰে।
আনহাতে, প্ৰধানমন্ত্ৰীগৰাকীৰ সাক্ষাতৰ সময়তে প্ৰধানমন্ত্ৰীগৰাকীক সাক্ষাৎ কৰি এখনি স্মাৰকপত্ৰ প্ৰদান কৰাৰ বাবেও এএছডিচি দলৰ তৰফৰ পৰা জিলা উপায়ুক্তৰ জৰিয়তে প্ৰচেষ্টা অব্যাহত ৰাখা বুলি সংবাদমেলত দলটোৰ জ্যেষ্ঠ নেতা দুগৰাকীয়ে উল্লেখ কৰে।
আনহাতে, কাঞ্চাচডিকমৰ তৰফৰ পৰা আজি বিয়লি ডিফুত এক সংবাদমেলৰ আয়োজন কৰি প্ৰধানমন্ত্ৰীগৰাকীক পাহাৰীয়া জিলাখনলৈ আদৰণি জনায়। প্ৰধানমন্ত্ৰীৰ কাৰ্বি আংলং জিলাৰ আগমণে পাহাৰীয়া এলেকাটোৰ দীৰ্ঘদিনীয়া ৰাজনৈতিক দাবী অনুসৰি এখন স্বায়ত্তশাসিত ৰাজ্য গঠনৰ দাবীয়ে বাস্তৱ ৰূপ লাভ কৰিব বুলি সংগঠনটোৱে আশা
ইয়াৰোপৰি জিলাখনৰ সকলো জাতি-উপজাতিৰ লগতে সকলো দল-সংগঠনৰ লেৰিনথেপিৰ উক্ত ৰাজহুৱা সভাত অংশগ্ৰহণৰ বাবে সংগঠনটোৱে আহ্বন জনায়।
