ৰাজ্যত ড্ৰাগছবিৰোধী অভিযান অব্যাহত ৰাখিছে অসম আৰক্ষীয়ে। ইতিমধ্যে ৰাজ্যৰ বিভিন্ন প্ৰান্তত বৃহৎ পৰিমাণৰ নিচাযুক্ত দ্ৰব্য আৰক্ষীয়ে জব্দ কৰাৰ লগতে গ্ৰেপ্তাৰ হৈছে বহুকেইজন সৰবৰাহকাৰী। সমান্তৰালভাৱে মহানগৰ আৰক্ষীয়েও অব্যাহত ৰাখিছে ড্ৰাগছবিৰোধী অভিযান। মহানগৰ আৰক্ষীয়ে বিভিন্ন স্থানত মাদক দ্ৰব্যৰ বিৰুদ্ধে অভিযান অব্যাহত ৰখাৰ লগতে ড্ৰাগছবিৰোধী চক্ৰ উৎখাত কৰিবলৈ সক্ষম হৈছে। তেনে এক অভিযানৰ অংশ হিচাপে আজি মহানগৰ আৰক্ষীৰ হাতত লাগে এক বৃহৎ সাফল্য।
গুৱাহাটী মহানগৰ যুটীয়া আৰক্ষী আয়ুক্ত পাৰ্থ মহন্ত আৰু উপ পৰিদৰ্শক কপিল পাঠকৰ নেতৃত্বত গুৱাহাটী আৰক্ষীৰ দলে চলোৱা অভিযানত এক আন্তৰাজ্যিক ড্ৰাগছ চক্ৰ ধৰা পৰে।
এক সূত্ৰৰ পমখেদি গুৱাহাটী আৰক্ষীৰ দলটোৱে চলোৱা অভিযানত যোৰাবাটত আন্তঃৰাজ্যিক ড্ৰাগছ চক্ৰটো জালত পেলায়। লগতে উক্ত নেটৱৰ্কটোৰ পৰা জব্দ কৰে বৃহৎ পৰিমাণৰ গাঞ্জা। এখন ট্ৰাকৰ পৰা ৮০০ কিলোগ্ৰাম গাঞ্জা জব্দ কৰে আৰক্ষীৰ দলটোৱে। চুবুৰীয়া ৰাজ্য মেঘালয়ৰ পৰা দক্ষিণৰ এখন ৰাজ্যলৈ উক্ত ড্ৰাগছখিনি সৰবৰাহ কৰা বুলি আৰক্ষী সূত্ৰে প্ৰকাশ।
