ৰূপকোঁৱৰ জ্যোতিপ্ৰসাদ আগৰৱালাদেৱৰ প্ৰথমখন নাটক ‘শোণিত কুঁৱৰী’ মঞ্চস্থৰ এশ বছৰ সম্পূৰ্ণ হ’ল। লগতে মহামানৱ মহাত্মা গান্ধীয়ে জ্যোতিপ্ৰসাদৰ বাসগৃহ ‘পকী’ দৰ্শনৰো এশ বছৰ পূৰ্ণ হৈছে।
এই শুভ ক্ষণত বৃহস্পতিবাৰে জ্যোতি ভাৰতী দৰ্শন কৰে মুখ্যমন্ত্ৰী হিমন্ত বিশ্ব শৰ্মাই। জ্যোতি ভাৰতী দৰ্শন কৰি মুখ্যমন্ত্ৰীয়ে কয়, “এই গৌৰৱময় ক্ষণত আজি মহান শিল্পীগৰাকীৰ স্মৃতিৰে সমৃদ্ধ সংগ্ৰহালয় আৰু পুথিভঁৰাল – তেজপুৰৰ ঐতিহ্যমণ্ডিত জ্যোতি ভাৰতী (পকী) দৰ্শন কৰাৰ এক অনন্য সুখানুভূতি লাভ কৰাৰ সৌভাগ্য হ’ল।
ৰূপকোঁৱৰ জ্যোতিপ্ৰসাদ আগৰৱালা, কলাগুৰু বিষ্ণুপ্ৰসাদ ৰাভা আৰু নটসূৰ্য ফণী শৰ্মাই অসমীয়া সংস্কৃতিৰ বৰঘৰ নিৰ্মাণ কৰিছিল। এই স্মৃতি সংৰক্ষণ আৰু সংবৰ্ধনৰ বাবে আমি সদা দায়বদ্ধ। মই আমাৰ নৱপ্ৰজন্মক জীৱনত এবাৰ হ’লেও ‘পকী’ দৰ্শন কৰিবলৈ আহ্বান জনালোঁ।”
উক্ত পৰিদৰ্শনকালত মুখ্যমন্ত্ৰীৰ সৈতে উপস্থিত থাকে সতীৰ্থ মন্ত্ৰী অশোক সিংহল, সাংসদ পল্লৱলোচন দাস, বিধায়কদ্বয় পৃথিৰাজ ৰাভা, কৃষ্ণ কমল তাঁতী, শোণিতপুৰৰ উপায়ুক্ত দেৱ কুমাৰ মিশ্ৰ, বিভিন্ন অনুষ্ঠান-প্ৰতিষ্ঠানৰ প্ৰতিনিধি আৰু স্থানীয় গণ্য-মান্য লোক।
