ৰাজ্যত বানৰ প্ৰকোপ এতিয়াও কমা নাই। বহু অঞ্চল আজিও পানীৰ তলত। ঘৰ-বাৰী এৰি হাজাৰ হাজাৰ বানাক্ৰান্তই আশ্ৰয় লৈ আছে সাহায্য শিবিৰত। তাৰ মাজতে মুখ্যমন্ত্ৰী হিমন্ত বিশ্ব শৰ্মাই পৰিভ্ৰমণ কৰি আছে ইখনৰ পিছত সিখন বানাক্ৰান্ত জিলা। খবৰ লৈছে বিভিন্ন স্থানৰ বানাক্ৰান্তৰ।
আজি মুখ্যমন্ত্ৰীয়ে মৰিগাঁও জিলাৰ বিভিন্ন আশ্ৰয় শিবিৰলৈ গৈ বানাক্ৰান্ত ৰাইজৰ দুখ-দুৰ্গতিৰ বুজ লয়। বানাক্ৰান্তসকলৰ দুখৰ সমভাগী হৈ মুখ্যমন্ত্ৰীয়ে কয়, “বন্যার্তসকলৰ কষ্ট সম্পূর্ণৰূপে হ্ৰাস কৰিবলৈ যদিও একোৱেই পৰ্যাপ্ত নহয়, তথাপি আমি তেওঁলোকৰ কাষলৈ গৈ অৱস্থাৰ বুজ লোৱাৰ লগতে কৰিব পৰা ধৰণে সকলোখিনি কৰিবলৈ যৎপৰোনাস্তি চেষ্টা কৰিছোঁ।”
আজি মৰিগাঁও জিলা পৰিদর্শনৰ অংশ হিচাপে বানৰ ফলত অস্থায়ীভাৱে স্থানচ্যুত হোৱা নেলীৰ ৰাষ্ট্ৰীয় ঘাইপথৰ কাষত অস্থায়ী সাহায্য শিবিৰত আশ্ৰয় লৈ থকা বানপীড়িতসকলৰ কাষত উপস্থিত হৈ তেওঁলোকৰ সৈতে কথা পাতে মুখ্যমন্ত্ৰীয়ে।
লগতে মৰিগাঁও জিলা প্ৰশাসনক পৰ্যাপ্ত আৰু সময়মতে সাহায্য প্ৰদান কৰি তেওঁলোকৰ সম্পূৰ্ণ যত্ন ল’বলৈ তেওঁ নির্দেশ দিয়ে। লগতে বান আক্রান্তসকলক বান পৰিস্থিতি উন্নত হোৱাৰ লগে লগেই তেওঁলোকৰ ঘৰলৈ ঘূৰাই পঠোৱা হ’ব বুলি আশ্বাস প্রদান কৰে। তাৰ বাবে চৰকাৰে যথোচিত ব্যৱস্থা গ্রহণ কৰিব বুলিও মুখ্যমন্ত্ৰীয়ে জনায়।
আনহাতে, আশ্ৰয় শিবিৰৰ এগৰাকী ব্যক্তিয়ে মুখ্যমন্ত্ৰীক আঁকোৱালি ধৰি তেওঁৰ দুখৰ কথা ব্যক্ত কৰে। মুখ্যমন্ত্ৰীয়েও তেওঁক সকলো ধৰণৰ সহায়ৰ আশ্বাস দি আশ্বস্ত কৰা বুলি জানিব পৰা গৈছে।
