সপ্তাহটোত দ্বিতীয় দিনাৰ বাবে শিলচৰৰ বান পৰিস্থিতি পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰঃ

শিলচৰৰ উপায়ুক্ত কাৰ্যালয়ত এখন পৰ্যালোচনা সভাত অংশগ্ৰহণ কৰি সাংবাদিকৰ মুখামুখি হৈ মুখ্যমন্ত্ৰী হিমন্তবিশ্ব শৰ্মাই কয় যে, চহৰখনৰ বেছিভাগ অঞ্চল বানত ডুব গৈছে আৰু জনসাধাৰণ বহু কষ্টৰ মাজত থকাৰ কথা অনুভৱ কৰিছোঁ। চৰকাৰ জনতাৰ কাষত সদায়েই আছে আৰু বানৰ ফলত দেখা দিয়া জনতাৰ দুখ-কষ্ট লাঘৱ কৰাৰ বাবে অহৰহ প্ৰশাসনে প্ৰচেষ্টা চলাই আছে।”

তেওঁ আগলৈ কয় যে, “অতীতত ৰাজ্যৰ বহুকেইখন জিলা বানপানীৰ সন্মুখীন হৈছে। কিন্তু শিলচৰৰ দৰে সাহায্যকাৰী নিয়োগ কৰা নাই। ৰাইজক উদ্ধাৰৰ বাবে ৬৮ খন নাওঁ আছে। এনডিআৰএফ ,এছ ডি আৰ এফ, ভাৰতীয় সেনা আৰু ভাৰতীয় বায়ুসেনাই নিৰন্তৰভাৱে কৰ্মসম্পাদন কৰি আছে।” একাংশ লোকে সাহায্য সামগ্ৰীসমূহ নোপোৱা অভিযোগক সঁচা বুলি কয় হিমন্তই কয় যে, “সকলো গলী পথ সমূহত এনডিআৰএফে প্ৰৱেশ কৰিব নোৱাৰে। নাওঁ সমূহও লেনবোৰত প্ৰৱেশ কৰিব পৰা নাই। এইক্ষেত্ৰত স্থানীয় লোকে বাহিনীটোক সহায় কৰিবলৈ আগুৱাই অহা উচিত।”

শিলচৰৰ বান পৰিস্থিতিৰ সামান্য উন্নতি হৈছে যদিও পৰিস্থিতি এতিয়াও জটিল হৈ আছে। বেটুকান্দিৰ মথাউৰি কটাত যি সকল জড়িত আছে তেওঁলোকৰ বিৰুদ্ধে কঠোৰ ব্যবস্থা লোৱা হ’ব বুলি প্ৰকাশ কৰে হিমন্তই লগতে বিভাগীয় কোনো বিষয়াৰ গাফিলতি ধৰা পৰিলে ৰেহাই দিয়া নহ’ব বুলি কয়।

তেওঁ কয় যে, “”গুৱাহাটীৰ পৰা শাক পাচলি পঠোৱাৰ ব্যবস্থা কৰা হ’ব ।অহাকালি মন্ত্ৰী জয়ন্তমল্ল বৰুৱাও শিলচৰত আহিব।” পৰিস্থিতি উন্নতি নোহোৱালৈ তেওঁ শিলচৰত থাকিব । এই দিনা মুখ্যমন্ত্ৰীৰ সৈতে মন্ত্ৰী পৰিমল শুক্লবৈদ্য, সাংসদ ডাঃ ৰাজদীপ ৰায়, বিধায়কদ্বয় দ্বীপায়ন চক্ৰৱৰ্তী আৰু কৌশিক ৰায় উপায়ুক্ত কীৰ্তি জল্লীয়ে সংগ প্ৰদান কৰে।