বৰপেটাৰ বান পৰিস্থিতি পৰ্যবেক্ষণ কৰি বুঢ়া সত্ৰীয়া বশিষ্ঠদেৱ শৰ্মাৰ আশিস গ্ৰহণ মুখ্যমন্ত্ৰী হিমন্ত বিশ্ব শৰ্মাৰঃ

উল্লেখ্য চলিত বৰ্ষৰ দ্বিতীয়টো বানত বৰপেটা জিলাৰ বহু লোকৰ গৃহকে ধৰি অন্যান্য সা-সম্পত্তি ক্ষতিগ্ৰস্ত হৈছে ৷ পৰ্যবেক্ষণ কালত জনসাধাৰণৰ সহায় তথা সকাহৰ অৰ্থে চৰকাৰে যিমানদূৰ সম্ভৱ সহায়ৰ হাত আগবঢ়াব বুলি আশ্বাস দিয়ে ৷ আনহাতে, বৰপেটা নগৰৰ সমীপৰে বৈ যোৱা হাৰিজান খনন কৰি বৃহত্তৰ অঞ্চলটোক ভৱিষ্যতে বানমুক্ত কৰি ৰখাৰ বাবে ৰাজ্য চৰকাৰে পদক্ষেপ গ্ৰহণ কৰিব বুলিও মুখ্যমন্ত্ৰীয়ে ৰাইজক আশ্বাস দিয়ে ৷

এই দিশত যাতে দীৰ্ঘম্যাদী পৰিকল্পনা গ্ৰহণ কৰিব পৰা যায় তাৰ বাবে মন্ত্ৰী পীযুষ হাজৰিকাই বৰপেটা ভ্ৰমণ কৰিব বুলিও লগতে তেওঁ কয়৷ আনহাতে, এই ভ্ৰমণৰ সময়তে মহাপুৰুষ দুজনাৰ একান্ত অনুগামী, বৰপেটা সত্ৰৰ বুঢ়া সত্ৰীয়া তথা শ্ৰীমন্ত শংকৰদেৱ বঁটাপ্ৰাপক বশিষ্ঠদেৱ শৰ্মাৰ আশিস গ্ৰহণ কৰে মুখ্যমন্ত্ৰীয়ে ৷

শিবিৰসমূহ পৰিদৰ্শনকালত মন্ত্ৰী ৰণজিৎ কুমাৰ দাস, জিলা উপায়ুক্ত তেজপ্ৰসাদ ভূষাল উপস্থিত থাকে ৷

আনহাতে, ভ্ৰমণকালত পাটবাউসী শ্ৰীশ্ৰীশংকৰদেৱ থানলৈ গৈ ৰাজ্যবাসীৰ কুশল-মংগল কামনা কৰি সেৱা জনাই আশিস গ্ৰহণ কৰে মুখ্যমন্ত্ৰীয়ে৷ মুখ্যমন্ত্ৰীয়ে কয়, “মহাপুৰুষ শ্ৰীশ্ৰীদামোদৰদেৱে ১৪৬২ শকত স্থাপন কৰা আদিধাম পাটবাউসী সত্ৰৰ পৱিত্ৰ ভূমিলৈ আহি গুৰুজনাৰ আশিস লৈ ধন্য হলোঁ৷”

সেই সময়ত সত্ৰখনত উপস্থিত থকা সঠিয়া সত্ৰৰ সত্ৰাধিকাৰ নাৰায়ণ চন্দ্ৰ দেৱগোস্বামীকো সাক্ষাৎ কৰি আশীৰ্বাদ লয় মুখ্যমন্ত্ৰীয়ে৷