অন্তৰ্বাসত মেটেল হুক এটা থকাৰ বাবে মেটেল ডিটেক্টৰটোত ‘বিপ’ শব্দ এটা হয়। তাৰ বাবেই দেওবাৰে কেৰালাৰ কোল্লাম জিলাত ৰাষ্ট্ৰীয় যোগ্যতা প্ৰৱেশ পৰীক্ষা (NEET)ত বহাৰ পূৰ্বে ছাত্ৰীক অন্তৰ্বাস খুলিবলৈ বাধ্য কৰাৰ অভিযোগ উত্থাপন হৈছে।
এই খবৰ পোহৰলৈ আহিছে এগৰাকী ছাত্ৰীৰ পিতৃয়ে আৰক্ষীৰ ওচৰ চপাৰ পিছত। ৰাজ্যিক মহিলা আয়োগে বিষয়টো চোৱাচিতা কৰি আছে। আনহাতে, কেৰালাৰ উচ্চ শিক্ষা মন্ত্ৰী আৰ বিন্দুৱে ৰাষ্ট্ৰীয় পৰীক্ষা সংস্থাৰ ফালে আঙুলিয়াই টোঁৱাই সোমবাৰে এটা টুইটত লিখিছে, “এয়া সংস্থাটোৰ ফালৰ পৰা এটা ডাঙৰ ভুল।
চুড়ান্ত দায়িত্বজ্ঞানহীনতা ।” কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানলৈ পত্ৰ লিখি বিন্দুৱে ক্ষোভ প্ৰকাশ কৰে। লগতে কেন্দ্ৰটোত পৰীক্ষা অনুষ্ঠিত কৰাৰ দায়িত্ব দিয়া সংস্থাটোৰ বিৰুদ্ধে ব্যৱস্থা গ্ৰহণৰ দাবী জনায়।
আনহাতে, মহিলা নিৰাপত্তাৰক্ষীয়ে আন ছাত্ৰ-ছাত্ৰী আৰু পুৰুষ পৰীক্ষকৰ সন্মুখত ষ্টʼৰ ৰুমত ছোৱালীকেইজনীক জোৰ কৰি অন্তৰ্বাস খুলি দিয়াৰ অভিযোগো উত্থাপন হৈছে।
ইফালে অভিযোগকাৰীয়ে কয় যে আপত্তি কৰাৰ বাবে তেওঁৰ ছোৱালীক কোৱা হৈছিল, “আপোনাৰ বাবে কোনটো ডাঙৰ? অন্তৰ্বাস নে পৰীক্ষা?” অৱশ্যে সংশ্লিষ্ট পৰীক্ষা কেন্দ্ৰৰ কৰ্তৃপক্ষই এই অভিযোগ অস্বীকাৰ কৰে। আনহাতে, এগৰাকী ছাত্ৰীৰ দেউতাকে কয়, “মোৰ ছোৱালীয়ে অষ্টম শ্ৰেণীৰ পৰা NEETৰ বাবে প্ৰস্তুতি চলাই আছে।
কিন্তু তাৰ পিছতো তেওঁ পৰীক্ষাটো সঠিকভাৱে দিব নোৱাৰিলে।” মানি বেগ, বেল্ট, টুপী, গহনা, জোতা সন্দৰ্ভত যদিও এন টি এৰ নিৰ্দেশনা আছে, কিন্তু অন্তৰ্বাস বা হুক সম্পৰ্কে কোনো উল্লেখ নাই বুলিও অভিভাৱকসকলে জনায়।
