বিবাহ বিচ্ছেদ হোৱা দম্পতীৰ ১১ বছৰীয়া শিশুটিক আমেৰিকাত থকা পিতৃৰ ওচৰলৈ পঠোৱাৰ নিৰ্দেশ উচ্চতম ন্যায়ালয়ৰ। উচ্চতম ন্যায়ালয়ে বেংগালুৰুত থকা মাতৃগৰাকীক কয় যে তেওঁৰ পুত্ৰৰ বাবে এয়াই সৰ্বোত্তম হ’ব। উচ্চতম ন্যায়ালয়ে লগতে কয় যে শিশুটিৰ ভৱিষ্যতৰ প্ৰতি লক্ষ্য ৰাখি এই নিৰ্দেশ দিয়া হৈছে।
উল্লেখ্য, ২০০৮ চনত বিয়া হোৱাৰ পিছত তেওঁলোক আমেৰিকালৈ গুচি যায়। তাত তেওঁলোকে গ্ৰীণ কাৰ্ড এখন লয়। সন্তান জন্ম হোৱাৰ কেইবছৰমান পিছতে দম্পতীহালৰ বিবাহ বিচ্ছেদ হোৱাত শিশুটিক লৈ ঘৰলৈ উভতি আহে মাতৃ। কিন্তু পিতৃয়ে শিশুটিক লগত ৰাখিবলৈ দাবী জনাই আদালতত গোচৰ তৰে।
ইয়াৰ পূৰ্বে কৰ্ণাটক উচ্চ ন্যায়ালয়ে শিশুটিক মাতৃৰ ওচৰত ৰাখিব লাগে বুলি ৰায় দিছিল যদিও উচ্চতম ন্যায়ালয়ে বেলেগ মতামত গ্ৰহণ কৰিছে। ন্যায়াধীশ এ এম খানৱিলাৰ আৰু ন্যায়াধীশ চি টি ৰবিকুমাৰৰ বিচাৰপীঠে উচ্চ ন্যায়ালয়ৰ ৰায় বাতিল কৰি কয় যে শিশুটিৰ স্বাৰ্থত শিশুটিক পিতৃৰ ওচৰত ৰখাটো ভাল। উচ্চতম ন্যায়ালয়ে পৰ্যবেক্ষণ কৰে যে শিশুটিৰ জন্ম আমেৰিকাত হৈছিল।
আমেৰিকান পাছপ’ৰ্ট আদিত কোৱা হৈছে যে তেওঁ আচলতে আমেৰিকাৰ বাসিন্দা। গতিকে মাতৃয়ে সন্তানক জন্মস্থানলৈ ঘূৰাই দিব লাগে। এই গোচৰত উচ্চতম ন্যায়ালয়ে কয় যে শিশুটি পিতৃৰ ওচৰত থকাটোৱেই ভাল। শীৰ্ষ আদালতে লগতে কয় যে ২০১১ চনৰ ৩ ফেব্ৰুৱাৰীত আমেৰিকাত জন্মগ্ৰহণ কৰা শিশুটি ২০২০ চনলৈকে তাতেই আছিল।
গতিকে সকলো দিশ বিবেচনা কৰি তেওঁক পিতৃৰ ওচৰলৈ পঠিয়াবলৈ নিৰ্দেশ দিয়া হৈছে। ইয়াৰ উপৰি আমেৰিকাৰ আদালতে শিশুটিক পিতৃৰ ওচৰত ৰখাৰ সপক্ষে ৰায়ো দিয়ে। আদালতে লগতে কয় যে সেই দেশৰ নাগৰিকৰ এই সমস্যাত আদালতে হস্তক্ষেপ নকৰে।
