আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ ঘৰত ফেডাৰেল ব্যুৰো অৱ ইনভেষ্টিগেশ্যনৰ অভিযানে প্ৰকাশ কৰিছে এক ডাঙৰ তথ্য। সংবাদ মাধ্যমৰ খবৰ অনুসৰি পাৰমাণৱিক নথি-পত্ৰ আৰু অন্যান্য গুৰুত্বপূৰ্ণ বস্তুৰ সন্ধান কৰাৰ সময়ত তাৰ পৰা প্ৰায় ১২টা বাকচ জব্দ কৰা হয়।
কিন্তু এফ বি আইৰ এজেণ্টে কোনো পাৰমাণৱিক অভিলেখ বিচাৰি পাইছেনে নাই সেই সন্দৰ্ভত তথ্য এতিয়াও প্ৰকাশ হোৱা নাই। এই ১২টা বাকচত কি আছিল সেয়াও প্ৰকাশ কৰা হোৱা নাই।
মঙলবাৰে এফ বি আইয়ে প্ৰাক্তন ৰাষ্ট্ৰপতি ট্ৰাম্পৰ বিলাসী পাম হাউছ আৰু মাৰ-এ-লিগো ৰিজ’ৰ্টত অভিযান চলায়। ট্ৰাম্পৰ দুজন ঘনিষ্ঠ বন্ধুৱে জনোৱা মতে, এই অভিযান কোনো জাননী নিদিয়াকৈ কৰা হৈছে। এজেণ্টসকলে অভিযান চলোৱাৰ সময়ত ট্ৰাম্প নিজেই তাত নাছিল। ট্ৰাম্পে অভিযানক প্ৰভাৱিত কৰি ৰাজনৈতিক বিষয় হিচাপে গঢ়ি তুলিব পৰাকৈ এনে কৰা হৈছিল বুলি ধাৰণা কৰা হৈছে।
বৃহস্পতিবাৰে এক সংবাদমেলত এটৰ্নী জেনেৰেল মেৰিক গাৰ্লেণ্ডে এই অভিযানৰ বিষয়ে তথ্য প্ৰদান কৰে। অৱশ্যে অভিযানৰ পিছত এফ বি আইৰ ওপৰত সংঘটিত হোৱা আক্ৰমণক তেওঁ গৰিহণা দিয়ে। এটৰ্নী জেনেৰেলে কয় যে তেওঁ ব্যক্তিগতভাৱে চাৰ্চ ৱাৰেণ্টত অনুমোদন জনাইছে।
আমেৰিকাৰ ন্যায় বিভাগে চাৰ্চ ৱাৰেণ্ট ৰাজহুৱা কৰাৰ সিদ্ধান্ত লোৱাৰ পিছতে তেওঁৰ এই বক্তব্য। বৃহস্পতিবাৰে ন্যায় বিভাগে এজন ন্যায়াধীশক মাৰ-এ-লিগো অভিযানৰ বাবে চাৰ্চ ৱাৰেণ্ট ৰাজহুৱা কৰিবলৈ কয় যাতে মানুহে জানিব পাৰে যে কিয় অভিযান চলোৱা হৈছে। প্ৰাক্তন ৰাষ্ট্ৰপতিগৰাকীৰ ওপৰত গ্ৰহণ কৰা ব্যৱস্থাৰ পিছত ৰিপাব্লিকান পাৰ্টিৰ জনসাধাৰণে এফ বি আইক গৰিহণা দিছে।
যোৱা বছৰ হোয়াইট হাউছৰ পৰা ওলাই অহাৰ সময়ত ট্ৰাম্পে বহু নথি-পত্ৰ লগত লৈ যোৱাৰ অভিযোগ উত্থাপন হৈছে। ১৫টা ডাঙৰ বাকচত এই নথিসমূহ মাৰ-এ-লেগোলৈ লৈ যোৱা হৈছিল। তেতিয়াৰ পৰা আমেৰিকাৰ চোৰাংচোৱা সংস্থাসমূহে ট্ৰাম্প আৰু তেওঁৰ ঘনিষ্ঠ সহযোগীসকলৰ ওপৰত চকু ৰাখিছিল। কিন্তু এতিয়ালৈকে এই অভিযোগ এফ বি আইয়ে নিশ্চিত কৰিব পৰা নাই।
এই অভিযান সন্দৰ্ভত ট্ৰাম্পে কয়, “আমেৰিকাৰ ৰাষ্ট্ৰপতিগৰাকীৰ লগত ইয়াৰ পূৰ্বে কেতিয়াও এনেকুৱা হোৱা নাছিল। তদন্তকাৰী সংস্থাসমূহৰ সহযোগিতাৰ পিছতো এনে ব্যৱস্থা গ্ৰহণ কৰা হৈছে। ন্যায়িক ব্যৱস্থাটোক অস্ত্ৰ হিচাপে অপব্যৱহাৰ কৰাৰ দৰেই। এইটো এটা কঠোৰ বাওঁপন্থী ডেম’ক্ৰেটসকলৰ আক্ৰমণ। ২০২৪ চনৰ নিৰ্বাচনত মই প্ৰতিদ্বন্দ্বিতা কৰাটো তেওঁলোকে নিবিচাৰে।”
