ড° হিমন্ত বিশ্ব শৰ্মাই জ্যোতি চিত্ৰবনত মুকলি কৰিলে অডিঅ’-ভিজুৱেল হাবঃ

অসমৰ চলচিত্ৰ জগতখনত নতুনত্ব প্ৰদান কৰাৰ উদ্দেশ্যৰে সোমবাৰে মুখ্যমন্ত্ৰী ড° হিমন্ত বিশ্ব শৰ্মাই গুৱাহাটীৰ কাহিলিপাৰস্থিত জ্যোতি চিত্ৰবনত নতুনকৈ নিৰ্মাণ কৰা এটা অডিঅ’-ভিজুৱেল হাবৰ শুভ উদ্বোধন কৰে।এই অডিঅ’-ভিজুৱেলটোৱে অনাগত দিন চলচিত্ৰ নিৰ্মাতা সকলক বহু পৰমাণে উপকৃত কৰিব।

কিয়নো, নিৰ্মাতাসকলে পোষ্ট প্ৰডাকশ্যনৰ বাবে মুম্বাই অথবা চেন্নাইলৈ নগৈ ডাবিংকে ধৰি সকলো বোৰ কাম জ্যোতি চিত্ৰবনৰ এই হাবত সম্পন্ন কৰিব পাৰিব। কেৱল সেয়াই নহয়, এই অডিঅ’- ভিজুৱেল হাব নিৰ্মাণ হোৱাৰ লগে লগে এতিয়া অসমতেই আহি হিন্দী,ইংৰাজী, তামিল, তেলেগুকে ধৰি সকলো ধৰণৰ চলচ্চিত্ৰৰ পোষ্ট প্ৰডাকশ্যনৰ কাম গুৱাহাটীতে সম্পন্ন কৰিব পাৰিব।

প্ৰায় ১০ কোটি টকা ব্যয় সাপেক্ষে নিৰ্মাণ কৰি উলিওৱা এই অডিঅ’-ভিজুৱেল হাব মুকলি কৰি মুখ্যমন্ত্ৰী ড° হিমন্ত বিশ্ব শৰ্মাই ৰূপকোঁৱৰ জ্যোতিপ্ৰসাদ আগৰৱালা অৱদান সমূহৰ ওপৰত আলোকপাত কৰাৰ লগতে কয় যে, “জ্যোতি চিত্ৰৱনত এতিয়ালৈকে ৫০০ খনৰো অধিক চলচ্চিত্ৰ নিৰ্মাণ কৰা হৈছে।

১৫০০ খন শ্ৰব্য চিডি, ২০০০ খন ভিডিঅ’ এলবাম আৰু ৫০০ খন তথ্য চিত্ৰ নিৰ্মাণ কৰা হৈছে।” আগলৈ কয় যে, “৭০ বিঘা মাটিত থকা জ্যোতি চিত্ৰৱনৰ সামগ্ৰিক উন্নয়ণৰ বাবে মাষ্টাৰ প্লেন তৈয়াৰ কৰিব লাগিব। এই ক্ষেত্ৰত সাংস্কৃতিক মন্ত্ৰী বিমল বৰাক ব্যৱস্থা গ্ৰহণ কৰিবলৈ নিৰ্দেশ দিয়া হৈছে। তেওঁ জ্যোতি চিত্ৰৱনত ১৫০০ মানুহ বহিব পৰা এটা প্ৰেক্ষাগৃহ নিৰ্মাণৰ বাবেও অনুমোদন দিয়ে।”

উল্লেখ্য যে, চৰকাৰে লাচিত বৰফুকনৰ পৰাক্ৰমৰ ওপৰত এখন তথ্য চিত্ৰ নিৰ্মাণ কৰিব বুলি উল্লেখ কৰে। অসমৰ চলচিত্ৰক বহু ভাষিক কৰাৰ আহ্বান জনাই গুৱাহাটীত আন কেইবাটাও প্ৰেক্ষাগৃহ নিৰ্মাণ কৰিব বুলি উল্লেখ কৰে ড° হিমন্গ বিশ্ব শৰ্মাই।

তেওঁ কয় যে, “খানাপাৰাত ৫ হাজাৰ দৰ্শক বহিব পৰাকৈ এক প্ৰেক্ষাগৃহ নিৰ্মাণ কৰাৰ লগতে মাছখোৱাৰ আই টি এ প্ৰকল্প পুনৰ নতুনকৈ গঢ়ি তুলিবলৈ চিন্তা চৰ্চা কৰা হৈছে। ইতিমধ্যে এই সম্পৰ্কে পৰিকল্পনা প্ৰস্তুত কৰা হৈছে।”মুখ্যমন্ত্ৰীগৰাকীয়ে অসমত চলচ্চিত্ৰ নীতি নতুন ধৰণে কৰাৰ ওপৰত গুৰুত্ব প্ৰদান কৰে ৷ অনুষ্ঠানত সাংস্কৃতিক মন্ত্ৰী বিমল বৰা, সাংসদ পবিত্ৰ মাৰ্ঘেৰিটা আৰু জ্যোতি চিত্ৰৱনৰ অধ্যক্ষ বিদ্যা সাগৰ উপস্থিত থাকে ৷