অৰুণাচল প্ৰদেশৰ পাহাৰত সেনাৰ হেলিকপ্টাৰ দুৰ্ঘটনাগ্ৰস্ত হৈ দুজন সেনাৰ মৃত্যু হোৱাৰ খবৰ পোৱা গৈছে। সেনাৰ সূত্ৰ অনুসৰি, হেলিকপ্টাৰখনত ৫ জন লোক আছিল। তাৰে ভিতৰত উদ্ধাৰ হৈছে দুটা মৃতদেহ। বাকীকেইজনক বিচাৰি উদ্ধাৰকাৰীয়ে অভিযান চলাইছে।
শুকুৰবাৰে পুৱা প্ৰায় ১১ বজাত আপাৰ চিয়াঙৰ পাহাৰীয়া গাঁও মিগিঙৰ সমীপত দুৰ্ঘটনাগ্ৰস্ত হয় হেলিকপ্টাৰখন। কিন্তু গাঁওখন দুৰ্গম অঞ্চলত। একমাত্ৰ উপায় হʼল এখন ওলমি থকা দলং। আপাৰ চিয়াঙৰ আৰক্ষী অধীক্ষক জুম্মাৰ বাছাৰে কয় যে চপাৰখন দুৰ্ঘটনাগ্ৰস্ত হোৱা ঠাইলৈ, গাঁৱৰ পৰা যোৱাটো অধিক প্ৰত্যাহ্বানজনক।
অৱশ্যে ইতিমধ্যে তিনিটা দলে উদ্ধাৰ অভিযান চলাই আছে। উদ্ধাৰ অভিযানৰ বাবে এখন মি-১৭ আৰু দুখন ধ্ৰুৱ হেলিকপ্টাৰ নমাই দিয়া হৈছে। ইয়াৰ উপৰি গাঁওবাসীৰ পৰাও সহায় লোৱা হৈছে শুকুৰবাৰে ১১ বজাত সেনা জোৱানৰ সৈতে এক নিয়মীয়া অনুশীলনত লিকাবালিৰ পৰা উৰা মাৰিছিল উন্নত লঘু হেলিকপ্টাৰখন।
ইয়াৰ পিছত ভাৰত-চীন সীমান্তৰ ওচৰৰ মিগিঙৰ ওচৰত ই ভাঙি পৰে।
উল্লেখ্য, চলিত মাহত ৫ অক্টোবৰত ৰুটিন অনুশীলনৰ সময়ত টাৱাঙত দুৰ্ঘটনাগ্ৰস্ত হৈছিল সেনাৰ চিতা হেলিকপ্টাৰ। সেই দুৰ্ঘটনাত দুজন পাইলটৰ মৃত্যু হৈছিল।
