তেলেংগানাৰ এজন চৰকাৰী অভিযন্তাৰ বিৰুদ্ধে অসমতাপূৰ্ণ সম্পত্তিৰ অভিযোগ (Fraud Officer) উত্থাপন হৈছে। ৰাজ্যৰ দুৰ্নীতি বিৰোধী শাখাৰ তথ্য অনুসৰি, তেওঁৰ পৰা ১০০ কোটি টকাৰ সম্পত্তি উদ্ধাৰ হৈছে। অভিযুক্ত অভিযন্তাজনৰ নাম বি ৰবীন্দ্ৰ। তেওঁ হায়দৰাবাদ মহানগৰ উন্নয়ন কৰ্তৃপক্ষৰ মুখ্য অভিযন্তা হিচাপে কৰ্মৰত আছিল। তেওঁৰ বিৰুদ্ধে অসমতাপূৰ্ণ সম্পত্তিৰ অভিযোগত গোচৰ ৰুজু কৰা হয়। ইয়াৰ পিছতে দুৰ্নীতি নিবাৰক শাখাই অভিযান আৰম্ভ কৰে।
এচিবিৰ সূত্ৰ অনুসৰি, অভিযন্তাজনৰ কেইবাটাও ঠিকনাত অনুসন্ধান চলোৱা হৈছে। কেৱল সেয়াই নহয়, তেওঁৰ আত্মীয়ৰ ঘৰতো তালাচী চলোৱা হয়। তদন্তকাৰীয়ে জনোৱা মতে, এতিয়ালৈকে স্থাৱৰ আৰু অস্থাৱৰ সম্পত্তিকে ধৰি ১০০ কোটি টকাৰ সম্পত্তি উদ্ধাৰ হৈছে। অৱশ্যে তেওঁলোকৰ মতে এয়া মাথোঁ সামান্য। তদন্তকাৰীয়ে বিশ্বাস কৰে যে সম্পত্তিৰ পৰিমাণ বহু বেছি হ’ব পাৰে।ৰঙাৰেড্ডী জিলাৰ কোণ্ডাকাল, কিস্তাপুল আৰু পাছামাইলাত পাঁচটুকুৰা ভূমি আছে বুলি এচিবিয়ে জানিবলৈ দিয়ে। নৰসিংহী আৰু নানাক্ৰামগুডাত চাৰিটা বিলাসী ফ্লেট উদ্ধাৰ হৈছে।
তদুপৰি তদন্তকাৰীয়ে ছামছাবাদৰ গুদুৰ গাঁৱত কেইবাঠাইতো কৃষিভূমি, মকিলাৰ এটা বিশাল বাংলো আৰু কোণ্ডাপুৰৰ এটা বাসগৃহ উদ্ধাৰ কৰিছে। তদন্তকাৰী সূত্ৰ অনুসৰি, অভিযন্তাজনৰ এটা ঠিকনাৰ পৰা নগদ ৪ লাখ টকা উদ্ধাৰ কৰা হৈছে। বেংকত আছে ৪৫ লাখ টকা। ইয়াৰ উপৰি আন এটা ঠিকনাৰ পৰা ডেৰ কেজি সোণ, ১৩ কেজি ৰূপ, প্ৰায় ১৮ লাখ টকাৰ আচবাব, ৯.৫ লাখ টকাৰ ইলেক্ট্ৰনিক গেজেট আৰু কেইবাখনো বিলাসী গাড়ী উদ্ধাৰ কৰা হৈছে। যাৰ মুঠ বৰ্তমান বজাৰ মূল্য ১ কোটি টকাতকৈও অধিক। অভিযন্তাজনক গ্ৰেপ্তাৰ কৰা হৈছে
উল্লেখ্য যে যোৱা মাহত এচিবিয়ে তেলেংগানা ৰাজহুৱা কাম বিভাগৰ অভিযন্তা মোহন নায়েক জাৰুপলাৰৰ ১০০ কোটি টকাৰ সম্পত্তিৰ সন্ধান লাভ কৰিছিল। তালাচী অভিযানৰ সময়ত অভিযন্তাজনৰ ঘৰৰ পৰা ১৮ কোটি টকা নগদ ধন উদ্ধাৰ কৰা হয়। ১৫টা ঠিকনাত অনুসন্ধান চলাইছিল এচিবিয়ে।
