সমগ্ৰ দেশৰ লগতে ডিফুতো ৰাষ্ট্ৰীয় প্ৰেছ দিৱস National Press Day দিনজোৰা কাৰ্যসূচীৰে পালন কৰা হয় ৷ জিলা প্ৰেছ ক্লাৱে Press Club তাৰালাংচ’ৰ পিপুলচ হলত আৰু ডিফু প্ৰেছ ক্লাৱে টাউন হলত ৰাষ্ট্ৰীয় প্ৰেছ দিৱস পালন কৰে ৷
তাৰালাচ’ৰ পিপুলচ হল’ত কাৰবি আংলং জিলা প্ৰেছ ক্লাৱৰ সভাপতি দিগন্ত টেৰণৰ সভাপতিত্বত হোৱা ৰাষ্ট্ৰীয় প্ৰেছ দিৱসৰ কাৰ্যসূচীত মুখ্য অতিথি ৰূপে কাৰবি আংলং স্বায়ত্ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, বিশিষ্ট অতিথি ৰূপে সাংসদ হৰেন ছিং বে, উপায়ুক্ত মধুমিতা ভাগৱতী, আৰক্ষী অধীক্ষক সঞ্জীৱ কুমাৰ শইকীয়া, জনসংযোগ বিভাগৰ কাৰ্যবাহী সদস্য সূৰ্য্য ৰংফাৰ আৰু নিদিষ্ট বক্তা হিচাবে জ্যেষ্ঠ সাংবাদিক, লেখক পবিত্ৰ বৰাই অংশগ্ৰহণ কৰে ৷
মুখ্য কাৰ্যবাহী ৰংহাঙে জনসংযোগ বিভাগৰ অতিৰিক্ত সঞ্চালক শেখৰ ইংতিৰ গ্ৰন্থ দ্যা ইমপ্ৰেক অব মিডিয়া ৰিপট’ উন্মোচন কৰে ৷ সাংসদ বেয়ে সাংবাদিকসকল সমাজৰ ওচৰত দায়বদ্ধ হোৱা উচিত বুলি কৈ কয় যে দলং এখনৰ ভঙাৰ সম্ভাৱনা থকা ফটো এখন লৈ ৰাখি দলং ভঙাৰ পিছত বাতৰি কৰাতকৈ আগতেই বাতৰি কৰি সংশ্লিষ্ট কৰ্তৃপক্ষক অৱগত কৰা উচিত ৷
উপায়ুক্ত ভাগৱতীয়ে ৰাষ্ট্ৰ নিৰ্মাণত সংবাদ মাধ্যমৰ ভূমিকা অতি গুৰুত্বপূৰ্ণ বুলি মন্তব্য কৰি কেনেদৰে সংবাদ মাধ্যমে সহায় কৰিব পাৰে তাৰ ব্যাখ্যা কৰে ৷ নিদিষ্ট বক্তাৰ আসনৰ পৰা জ্যেষ্ঠ সাংবাদিক পবিত্ৰ বৰাই সাংবাদিকৰ দায়বদ্ধতা, নৈতিকতা , মানবতা কেনে হোৱা উচিত তাৰ উদাহৰণ দি এক সাৰগৰ্ভ ভাষণ দিয়ে ৷ জিলা প্ৰেছ ক্লাৱে আজি ডিফুৰ পৰা প্ৰথম দৈনিক কাৰবি বাতৰি কাকত প্ৰকাশ কৰা টি পি হাঞ্চেক সাংবাদিক বঁটা প্ৰদান কৰে ৷
শাৰিৰীকভাবে অসুস্থ হাঞ্চে অনুষ্ঠানত উপস্থিত থাকিব নোৱাৰাত তেওঁৰ হৈ ভাতৃৰ হাতত মুখ্য কাৰ্যবাহী সদস্য তুলিৰাম ৰংহাঙে আনুষ্ঠানিক ভাবে বঁটাটো প্ৰদান কৰে ৷ পিছত জিলা প্ৰেছ ক্লাৱৰ এটা দল গৈ তেওঁক ঘৰত আনুষ্ঠানিক ভাৱে সম্বৰ্দ্ধনা জ্ঞাপন কৰে ৷
কাৰবি আংলং জিলাৰ বিভিন্ন প্ৰেছ ক্লাৱৰ সভাপতি-সম্পাদক আৰু সাংবাদিক সকলৰ লগতে জ্যেষ্ঠ সাংবাদিক সঞ্জু বৰা, প্ৰদীপ নাথ, স্বৰূপ লস্কৰ ,দেৱজ্যোতি বৰা প্ৰমুখ্যে সাংবাদিক সকলে অনুষ্ঠানত অংশগ্ৰহণ কৰে।
ইফালে টাউন হলত ডিফু প্ৰেছ ক্লাৱৰ সভাপতি বৰছিং ৰংফাৰৰ সভাপতিত্বত হোৱা মুকলি সভাতো মুখ্য কাৰ্যবাহী সদস্য তুলিৰাম ৰংহাং , সাংসদ হৰেন ছিং বে উপস্থিত থাকে ৷ মুখ্য কাৰ্যবাহী ৰংহাঙে ডিফু প্ৰেছ ক্লাৱৰ স্মৰণিকা উন্মোচন কৰে ৷ জ্যেষ্ঠ সাংবাদিক ৰামেশ্বৰ চৌহান , সুশান্ত ৰয় প্ৰমুখ্যে সাংবাদিক সকল ৰাষ্ট্ৰীয় প্ৰেছ দিৱসত উপস্থিত থাকে ৷
