মুম্বাই-গোৱা ৰাষ্ট্ৰীয় ঘাইপথত(Mumbai-Goa National Highway) সংঘটিত পথ দুৰ্ঘটনাত ১ শিশুসহ ৯ জন লোকে প্ৰাণ হেৰুৱায়। নিহতসকলৰ ভিতৰত আছে ৩ গৰাকী মহিলা। সংঘৰ্ষৰ প্ৰভাৱত দুৰ্ঘটনাগ্ৰস্ত গাড়ীখন চেপেটা হৈ পৰে। ফলত থিতাতে মৃত্যু হয় ৯ জন লোকৰ। চিকিৎসালয়লৈ নিয়াৰ কোনো সুযোগে পোৱা নগ’ল।মুম্বাই-গোৱা ৰাষ্ট্ৰীয় ঘাইপথত ভয়ংকৰ দুৰ্ঘটনা:
বৃহস্পতিবাৰে পুৱা ৰাষ্ট্ৰীয় ঘাইপথটোত মুম্বাই অভিমুখে গৈ আছিল এখন কাৰ্গো ট্ৰাক। বিপৰীত দিশৰ পৰা ১০ খন আসনৰ গাড়ী এখন আহি আছিল। ৰত্নাগিৰি জিলাৰ গুহাটোৰ ফালে গৈ আছিল গাড়ীখন। সেই সময়ত গাড়ীখনে নিয়ন্ত্ৰণ হেৰুৱাই ট্ৰাকৰ সন্মুখত পৰে। যদিও মুখামুখি সংঘৰ্ষত ট্ৰাকখনৰ কোনো গুৰুতৰ ক্ষতি হোৱা নাই, তথাপিও আনখন গাড়ীখনত থকা আটাইকেইজন লোকৰ মৃত্যু হয়। মৃতসকলৰ ভিতৰত ৫ জন পুৰুষ। আৰক্ষীৰ প্ৰাৰম্ভিক ধাৰণা হৈছে যে মৃত লোকসকল একেটা পৰিয়ালৰ সদস্য।
দুৰ্ঘটনাটোৰ বাবে পথটোৰ যাতায়াত কিছু সময়ৰ বাবে বন্ধ হৈ পৰে। কিন্তু যান-বাহন আৰক্ষীৰ তৎপৰতাৰ ফলত এঘণ্টাৰ পাছত লাহে লাহে যান-বাহন চলাচল স্বাভাৱিক অৱস্থালৈ ঘূৰি আহে। আৰক্ষীৰ সূত্ৰ অনুসৰি, দুৰ্ঘটনাটোৰ কাৰণৰ তদন্ত অব্যাহত আছে। যদিও ঘটনাটো পুৱাৰ ভাগত সংঘটিত হয়, তথাপিও অঞ্চলটোত বিশেষ কুঁৱলীৰ সৃষ্টি হোৱা নাছিল বুলি প্ৰত্যক্ষদৰ্শীয়ে জানিবলৈ দিয়ে। চালকজন টোপনি গৈছিল নে মদ্যপান কৰিছিল সেই ক্ষেত্ৰত আৰক্ষীয়ে তদন্ত চলাই আছে।
