বিগত ৩০ জানুৱাৰী তাৰিখে চকলেট খোৱাৰ প্ৰলোভনেৰে ডিব্ৰুগড় চহৰৰ (Dibrugarh) মাজমজিয়াৰ পৰা এটি ৪ বছৰীয়া শিশুক অপহৰণ (Child Kidnap) কৰা হৈছিল। আজি আশ্চৰ্যজনক ভাৱে শিশুটিক পুৰণি হাইস্কুল খেলপথাৰৰ সমীপৰ পি ডব্লিউ কলনীত আৰক্ষী অধীক্ষক বাসগৃহৰ সমীপত এটা জাবৰৰ দমত পৰিত্যক্ত অৱস্থাত উদ্ধাৰ কৰা হয়। এই ঘটনাটোৱে সমগ্ৰ অঞ্চলটোত শেহতীয়াকৈ চাঞ্চল্যৰ সৃষ্টি কৰিছে।
শিশুটিৰ অপহৃত হোৱাৰ লগে লগে চি চি টিভিৰ ভিডিঅ’ ফুটেজ পৰ্যন্ত ডিব্ৰুগড়ৰ আৰক্ষীক দিয়া হৈছিল আৰু যোৱা ১ ফেব্ৰুৱাৰীত অপহৃতৰ সন্ধান উলিওৱাৰ দাবীত সদৰ থানা ঘেৰাও কৰি স্থানীয় লোকে ধৰ্ণাৰে এক উতপ্ত পৰিস্থিতিৰ স্বৃষ্টি কৰিছিল যদিও ডিব্ৰুগড়ৰ স্মাৰ্ট আৰক্ষীয়ে প্ৰকৃত অপহৰণকাৰী আৰু অপহৃতৰ সন্ধান উলিওৱাৰ ক্ষেত্ৰত চুড়ান্তভাবে ব্যৰ্থ হোৱাত উত্তেজিত হৈ পৰিছিল স্থানীয় লোক সকল।
উল্লেখ্য যে, শিশুটিক চকলেট দিয়াৰ প্ৰলোভন দি লৈ যোৱা ব্যক্তি জনক চিনাক্ত কৰি ইতিমধ্যে গ্ৰেপ্তাৰ কৰে আৰক্ষীয়ে। এই সন্দৰ্ভত আজি আৰক্ষী অধীক্ষক শ্বেতাংগ মিশ্ৰাই সংবাদমেলৰ জৰিয়তে জানিবলৈ দি কয় যে গ্ৰেপ্তাৰ কৰা মূল অভিযুক্ত জনৰ নাম সুৰজ কৰ্মকাৰ।
কৰ্মকাৰক প্ৰধানত এজন মদাহী বুলি উল্লেখ কৰি প্ৰলোভনৰে অপহৰণ কৰি শিশুটিৰ ওপৰত যৌন অতিশয্য চলাইছিল। লগতে সুৰজ কৰ্মকাৰে অপহৰণ কৰা বুলিও স্বীকাৰোক্তি দিছে বুলি সদৰী কৰে যদিও কি উদ্দেশ্যে শিশুটিক অপহৰণ কৰা হৈছিল সেয়া আৰক্ষীৰ আগত প্ৰকাশ কৰা নাই।
কিন্তু আৰক্ষীৰ জালত অভিযুক্ত থকাৰ পিছতো কেনেদৰে শিশুটিৰ নিৰ্যাতন চলাই হত্যা কৰা হ’ল সেয়া এতিয়াও প্ৰশ্নৰ আৱৰ্তত। আনহাতে, মৰণোত্তৰ পৰীক্ষাৰ পিছত মৃতদেহ পৰিয়ালৰ লোকক চমজাই দিবলৈ অহাত স্থানীয় লোকে চমজি লোৱাৰ অস্বীকাৰ কৰি বাতৰি লিখা পৰলৈকে ৩৭ নং ৰাষ্ট্ৰীয় ঘাইপথ অৱৰোধ কৰি ৰাখিছে।
