অবৈধ স্বামৰ বিৰুদ্ধে ৰাজ্যত চলি থকা অভিযানৰ লগত সংগতি ৰাখি কাৰবি আংলং জিলা আৰক্ষীয়ে(Karbi Anglong Police) যোৱা নিশা আৰু আজি কাৰবি আংলং জিলাৰ বিভিন্ন প্ৰান্তত অভিযান চলাই ৫৩ গৰাকী অবৈধ স্বামী বাল্য বিবাহ সম্পন্ন কৰা লোকক আটক কৰিবলৈ সক্ষম হৈছে ৷
আজি ডিফুস্থিত জিলা আৰক্ষীৰ মুখ্য কাৰ্যালয়ৰ সন্মেলন কক্ষত এক সংবাদ মেলৰ আয়োজন কৰি আৰক্ষী অধীক্ষক সঞ্জীৱ কুমাৰ শইকীয়াই কয়যে, যোৱা২ মাহ পূৰ্বে আৰক্ষী অধীক্ষক সকলৰ সৈতে হোৱা কনফাৰেন্সত অসমৰ মুখ্যমন্ত্ৰী ডঃ হিমন্ত বিশ্ব শৰ্মাই অসমত হোৱা বাল্যবিবাহকলৈ উদ্বিগ্নতা প্ৰকাশ কৰিছিল ৷
মুখ্যমন্ত্ৰী গৰাকীয়ে আৰক্ষী অধীক্ষক সকলৰ পৰা অসমত সম্পন্ন হোৱা বাল্য বিবাহৰ তথ্য বিবাহৰ তথ্য বিচাৰিছিল আৰু ব্যৱস্থা গ্ৰহণৰ বাবে নিৰ্দেশ প্ৰদান কৰিছিল ৷ সেই মৰ্মে জিলাখনৰ আৰক্ষী বিভাগে গাওঁৰক্ষী বাহিনী আৰু ব্যক্তিগত চোৰাংচোৱা ব্যৱহাৰ কৰি বৃহস্পতিবাৰলৈকে কাৰবি আংলঙত বাল্যবিবাহৰ বিৰুদ্ধে ১২৬ টা গোছৰ ৰুজো কৰে বুলি জানিবলৈ দি কালি নিশা আৰু আজি অভিযান চলাই জিলাখনৰ বিভিন্ন প্ৰান্তৰ পৰা ৫৩ গৰাকী অবৈধ স্বামী আৰু বাল্যবিবাহত জড়িত লোক সকলক আটক কৰি জেল হাজোতলৈ প্ৰেৰণ কৰিছে বুলি জানিবলৈ দিছে আৰক্ষী অধীক্ষক গৰাকীয়ে ৷
২০০৬ চনত বাল্য বিবাহ প্ৰতিৰোধ আইন প্ৰণয়ন হৈছে যদিও বৰ্ধিত হাৰত সম্পন্ন হোৱা বাল্য বিবাহৰ ফলত প্ৰসূতিৰ মৃত্যুৰ লগতে নৱজাতকৰ মৃত্যুৰ হাৰ বদ্ধি পোৱাকলৈ ভাৰত চৰকাৰৰ লগতে অসম চৰকাৰো উদ্বিগ্ন হৈ পৰিছিল ৷ আৰু ইয়াক বন্ধ কৰাৰ নিৰ্দেশ প্ৰদান কৰিছিল বুলি কয় ৷ প্ৰসূতি মৃত্যু নৱজাতকৰ মৃত্যুৰ হাৰ হ্ৰাস কৰাৰ লক্ষ্যৰে বাল্য বিবাহৰ বিৰুদ্ধে অভিযান চলাইছে অসম আৰক্ষীয়ে ৷
তথ্য অনুসৰি কাৰবি আংলঙৰ বিভিন্ন থানা ক্ৰমে, আঞ্জুকপানীত ১ জন, বোকাজানত ২ জন, বকলীয়াঘাটত ৬ জন, বৰলাংফেৰত ৩ জন, বৰপথাৰত ৩ জন, চকীহোলাত ১ জন, দেইথৰত ৩ জন, ডিলাইত ৬ জন, ডিফুত ৪ জন, ডকমকাত ৬ জন, ডলামৰাত ১ জন হাওৰাঘাট ২ জন, খটথটীত ৪ জন, মাঞ্জাত ১০ জন, ৰংমংবে ০ আৰু ছামেলাংছ’ত ১ জনক ধৰি মুঠ ৫৩ ডনক আটক কৰা হৈছে বুলি জানিবলৈ দিছে আৰক্ষী অধীক্ষক সঞ্জীৱ কুমাৰ শইকীয়াই ৷
বাসল্য বিবাহৰ বিৰুদ্ধে ৰুজো হোৱা গোছৰৰ সকলো আচামী গ্ৰেপ্তাৰ নোহোৱালৈকে এই অভিযান চলি থাকিব বুলি সংবাদমেলত সদৰি কৰে আৰক্ষী অধীক্ষক গৰাকীয়ে ৷ আনহাতে বাল্যবিবাহৰ পলাতক আচামী সকল যিহেতু প্ৰফেচনেল অপৰাধী নহয় সেয়ে তেওঁলোককো শীঘ্ৰে আৰক্ষীয়ে আটক কৰিবলৈ সক্ষম হব বুলি কয় ৷
আনহাতে অবৈধ স্বামী সকলক গ্ৰেপ্তাৰ পিছত বিশেষকৈ খটখটী আৰু ডকমকা থানাত স্বামী সকলৰ পত্নী আৰু আত্মীয়ৰ মাজত কান্দোনৰ ৰোল উঠে ৷ পত্নী আৰু মাতৃ সকলে গ্ৰেপ্তাৰ হোৱা স্বামী বা পত্নীক জেললৈ লৈ গলে তেওঁলোকৰ জৱনলৈ অন্ধকাৰ নামি আহিব বুলি কয় ৷ সেয়ে তেওঁলোকৰ স্বামী বা পত্নীক মুকলি কৰি দিবলৈ দাবী জনায় ৷
