আজি ত্ৰিপুৰাত (Tripura) অনুষ্ঠিত হৈ আছে বিধানসভা নিৰ্বাচন (Election)। পুৱা ৭ বজাৰ পৰা আৰম্ভ হৈছে ভোট গ্ৰহণ প্ৰক্ৰিয়া। মুক্ত, নিকা আৰু শান্তিপূৰ্ণ নিৰ্বাচন অনুষ্ঠিত কৰাৰ বাবে প্ৰয়োজনীয় সকলো পদক্ষেপ গ্ৰহণ কৰা হৈছে বুলি নিৰ্বাচন আয়োগে প্ৰকাশ কৰে। অৱশ্যে বিৰোধী বাম-কংগ্ৰেছৰ মিত্ৰতা, তৃণমূল আনকি জনজাতি দল টিপ্ৰা মাথাই (Tipra Motha) শাসকীয় বিজেপিৰ বিৰুদ্ধে নিৰ্বাচনী সন্ত্ৰাসৰ পৰিকল্পনা কৰাৰ অভিযোগ উত্থাপন কৰিছে।
বৃহস্পতিবাৰে পুৱা ৭ বজাৰ পৰা ত্ৰিপুৰাৰ আটাইকেইটা ৬০টা সমষ্টিতে ভোটগ্ৰহণ আৰম্ভ হৈছে। ২ মাৰ্চত উত্তৰ-পূৱৰ(Northeast) আন দুখন ৰাজ্য মেঘালয় (Meghalaya) আৰু নাগালেণ্ডৰ (Nagaland) সৈতে একেলগে গণনা কৰা হʼব। প্ৰতিদ্বন্দ্বীসকলৰ ভিতৰত আছে মুখ্যমন্ত্ৰী তথা বিজেপি নেতা মাণিক সাহা, উপ-মুখ্যমন্ত্ৰী জিষ্ণু দেবৰ্মা (বিজেপি), চিপিএমৰ ৰাজ্যিক সম্পাদক জিতেন্দ্ৰ চৌধুৰী আৰু কংগ্ৰেছৰ বিধায়ক সুদীপ ৰায় বৰ্মন।
বিগত বৰ্ষৰ জুন মাহত ৰাজ্যৰ চাৰিখন বিধানসভাৰ আসনৰ উপ-নিৰ্বাচনৰ ফলাফলে ইংগিত দিছিল যে বিৰোধীয়ে মিত্ৰতা কৰিলে বিজেপিয়ে সমস্যাৰ সন্মুখীন হʼব পাৰে। ইয়াৰ পিছত আংশিকভাৱে বিৰোধী ঐক্যৰ সৃষ্টি হয়। বাওঁপন্থীয়ে ৪৬খন আসনত প্ৰতিদ্বন্দ্বিতা আগবঢ়াইছে, ১৩খন আসন এসময়ৰ প্ৰতিদ্বন্দ্বী কংগ্ৰেছৰ হাতত আৰু ১খন আসন নিৰ্দলীয় প্ৰাৰ্থীৰ হাতত। কেইটামান নিৰ্বাচন সমীক্ষাৰ পৰা ইংগিত পোৱা গৈছে যে বিজেপিৰ সৈতে মূল প্ৰতিদ্বন্দ্বিতা হʼব বাংলা প্ৰধান ৪০খন আসনত বাওঁ-কংগ্ৰেছৰ মিত্ৰজোঁট। অৱশ্যে বুধবাৰে মুখ্যমন্ত্ৰী মাণিক সাহাই (Manik Saha) কয় যে এইবাৰ তেওঁলোক বিনা প্ৰতিদ্বন্দ্বিতাই বিধানসভা দখলৰ বাবে অপেক্ষা কৰি আছে।
ত্ৰিপুৰাত স্বায়ত্ত শাসিত জনজাতি পৰিষদ (ADC) এলেকাত ২০টা বিধানসভা সমষ্টি আছে। তাত বিজেপি তথা মিত্ৰ জনজাতি পাৰ্টি আইপিএফটিৰ মূল প্ৰতিদ্বন্দ্বী হৈছে ত্ৰিপুৰাৰ ৰাজপৰিয়ালৰ বংশধৰ প্ৰদ্যুৎ বিক্ৰম মাণিক্য দেৱবৰ্মনৰ দল টিপ্ৰা মাথা। নিৰ্বাচনী প্ৰচাৰৰ সময়ত প্ৰদ্যুতে দাবী কৰিছিল যে কোনো শিবিৰে আধিপত্য বিস্তাৰ কৰিব নোৱাৰে। সেই ক্ষেত্ৰত টিপ্ৰাই ‘কিং মেকাৰ’ হʼব পাৰে বুলি ভোটদান পণ্ডিতৰ এটা অংশই ভাবে।
