তাৰালাংছৰ পৰা কiমৰুল খানঃ কাৰবি জনজাতিসকলৰ বাৰেৰহণীয়া ক’লা-কৃষ্টি সংস্কৃতিৰ বিজয় ধ্বজা উৰুৱাই আজিৰে পৰা তাৰালাংচৰ (Taralangso) বাকৰিত আৰম্ভ হ’ল ৪৯ সংখ্যক কাৰবি যুৱ মহোৎসৱ (49th Karbi Youth Festival) ৷ কাৰবি যুৱতীসকলৰ পিনি, পেককৰ খমখমনিত ৰজনজনাই উঠিছে তাৰালাংচৰ চৌদিশ ৷ ইয়াৰ মাজতে আজি কাৰবি ৪৯ সংখ্যক কাৰবি যুৱ মহোৎসৱৰ দ্বিতীয় দিনা আনুষ্ঠানিক ভাবে আৰম্ভ হোৱা কাৰবি যুৱ মহোৎসৱ থলীত বিভিন্ন জাতি-জনগোষ্ঠীৰ লোক কৃষ্টি সংস্কৃতিৰে বৰ্ণময় হৈ পৰে কাৰবি সাংস্কৃতিক প্ৰকল্প তাৰালাংচ ৷
জিলাখনৰ ভিন্ন প্ৰান্তৰ পৰা অহা শিল্পীসকলৰ হাতে হাতে চেংপি, চেংচ’, চেংবৰুক, চং আদিৰে শোভাবৰ্দ্ধিত হোৱাৰ লগতে মূৰত পহ’ ৱজাৰু, আংনি, পুৰুষৰ গাত চইক’ চয়াং,তিৰুতাৰ গাত পিনি, পেকক, কঁকালত ৱামকক, দুই হাতত চংনক আদিৰে কাৰবি ৰিচ’ নিমচ’ সকলে বৰ্ণিল শোভাযাত্ৰা উলিয়াই কাৰবি সাংস্কৃতিক সমাজৰ পতাকা উত্তোলন থলীত উপস্থিত হয়৷
কেচিএছৰ সভাপতি চন্দ্ৰছিং ক্ৰ’ই ৪৯ সংখ্যক কাৰবি যুৱ মহোৎসৱৰ পতাকা উত্তোলন কৰাৰ পিছত কাৰবি পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৪৯ সংখ্যক কাৰবি যুৱ মহোৎসৱৰ উদ্ধোধন কৰে ৷
কাৰ্যসূচীৰ প্ৰাৰম্ভনিতে কাৰবি সাংস্কৃতিক গুৰু ৰাংছিনা ছাৰপ’ৰ প্ৰতিমূৰ্তি শ্ৰদ্ধাঞ্জলী নিবেদন কৰা হয় ৷ লগতে শ্বহীদ সকলৰ স্মৃতিত শ্বহীদ তৰ্পনো কৰা হয় ৷ আজিৰ এই বৰ্ণিল কাৰ্যূসূচীত কাৰবি ৰজা ৰামছিং ৰংহাঙ, ধনেশ্বৰ ইংতিকে প্ৰমুখ্য কৰি শাসক, বিৰোধী আৰু আঞ্চলিক দলৰ বহুকেইগৰাকী ৰাজনৈতিক নেতা-কৰ্মীৰ লগতে জিলাখনৰ দল-সংগঠন সমূহৰ সভাপতি সম্পাদক সকল অতিথি হিচাপে উপস্থিত থাকে ৷
ইয়াৰ পূৰ্বে শিল্পী গ্ৰামৰ পৰা বৰ্ণিল সাংস্কৃতিক শোভাযাত্ৰাৰে হেমফু মুক্ৰাং বাকৰিত উপস্থিত হয় শিল্পীসকল। নৱ ৰূপত প্ৰাণ পাই উঠিছে উঠিছে ডিফুৰ তাৰালাংছ’ৰ বাকৰি। কাৰ্বি কালচাৰেল ছচাইটিৰ উদ্যোগত প্ৰতি বছৰৰ দৰে এইবছৰো আজিৰ কাৰ্যসূচী সমূহ তদাৰক কৰে কেচিএছৰ সাধাৰণ সম্পাদক বিদ্যাছিং ৰংপিয়ে ৷
কাৰবি আংলঙৰ লগতে অসমৰ ভিন্ন প্ৰান্তৰ কাৰ্বি আংলঙ (Karbi Anglong)ৰ কাৰ্বি কালছাৰেল ছচাইটিৰ অতি কমেও ৩১ টা সাংস্কৃতিক মণ্ডলে অংশগ্ৰহণ কৰিছে। সাংবাদিকৰ সৈতে হোৱা বাৰ্তালাপত মুখ্য অতিথি হিছাপে উপস্থিত থকা কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৪৯ সংখ্যক কাৰবি যুৱ মহোৎসৱৰ বাবে জিলাবাসীক শুভেশ্চা জনায় ৷ অহা বছৰ কাৰবি যুৱ মহোৎসৱৰ গৌৰৱোজ্জ্বল সোণালী বৰ্ষ উপলক্ষে ভাৰতৰ ৰাষ্ট্ৰপতি আৰু প্ৰধান মন্ত্ৰী নিমন্ত্ৰণ জনোৱাৰ চিন্তা-চৰ্চা কৰি থকা হৈছে বুলি জানিবলৈ দিছে ৷
