লাহে লাহে গৰম হৈ আহিছে জি-২০ (G-20) কাৰ্যসূচী। জি-২০ দেশৰ বিত্তমন্ত্ৰী আৰু কেন্দ্ৰীয় বেংকৰ গৱৰ্ণৰৰ বৈঠক দুৱাৰ দলিত উপনীত হৈছে। চলিত মাহৰ ২৪ আৰু ২৫ তাৰিখে বাংগালুৰুত অনুষ্ঠিত হʼব এই বৈঠক। জি-২০ৰ পৰা লাভৱান হʼব পৰা চুবুৰীয়া দেশসমূহক আমন্ত্ৰণ জনোৱা হৈছে। সূত্ৰ অনুসৰি, এই বৈঠকলৈ পাকিস্তানক নিমন্ত্ৰণ নকৰাৰ সম্ভাৱনা অধিক।
মঙলবাৰে এক সাক্ষাৎকাৰত বৈদেশিক পৰিক্ৰমা মন্ত্ৰী এছ জয়শংকৰক (Minister S Jaishankar) প্ৰশ্ন কৰা হয় যে ভাৰতে আন ঋণী চুবুৰীয়া দেশৰ কাষত থিয় দিছে নেকি? পাকিস্তানৰ বাবে কিবা পৰিকল্পনা আছেনে? উত্তৰত তেওঁ কয়, “এদিনতে কোনেও ভয়াৱহ সংকটত নপৰে। নিজৰ বাবেই আজি পাকিস্তানৰ এই অৱস্থা। আৰু কাৰোবাক সহায় কৰাৰ প্ৰশ্নত ভাৰতৰ সৈতে সেই দেশৰ সম্পৰ্কৰ গুৰুত্বৰ প্ৰতি লক্ষ্য ৰখা হৈছে।”উদাহৰণ হিচাপে বৈদেশিক মন্ত্ৰীয়ে শ্ৰীলংকাৰ কথা উল্লেখ কৰে। তেওঁ বুজাই দিলে যে ইছলামাবাদৰ সৈতে সম্পৰ্ক একেবাৰেই নাই।
সূত্ৰসমূহৰ মতে, আগন্তুক বৈঠকত ইউক্ৰেইনৰ যুদ্ধত স্তব্ধ হোৱা সামগ্ৰিক অৰ্থনীতিৰ পুনৰুদ্ধাৰৰ বিষয়ে আলোচনা কৰা হʼব। উন্নয়নশীল দেশসমূহৰ ঋণৰ বোজা হ্ৰাস কৰাৰ উপায় বিচৰা হʼব। এই বৈঠকলৈ আহি আছে আমেৰিকাৰ কোষাগাৰ সচিব জেনেট য়েলেন। এই প্ৰেক্ষাপটত তেওঁ চীনৰ ওপৰত হেঁচা সৃষ্টি কৰিবলৈ ওলাইছে বুলি জনা যায়। আমেৰিকাই কয় যে চীনে কম আৰু মধ্যম আয়ৰ দেশসমূহক দিয়া বৃহৎ ঋণ বন্ধ কৰাৰ কথা চিন্তা কৰিব লাগে। নতুন দিল্লীয়েও কয় যে বেইজিঙে ইতিমধ্যে বাতিল কৰাৰ সিদ্ধান্ত লৈছে।
