দিল্লীৰ চৰকাৰী বিদ্যালয়ৰ (Delhi Govt School) অবস্থা ভাললৈ আনিছিল তেওঁ। আন ৰাজ্যত ছাত্ৰ-ছাত্ৰীয়ে চৰকাৰী বিদ্যালয় ত্যাগ কৰি ব্যক্তিগত বিদ্যালয়ত যোগদান কৰাৰ বিপৰীতে দিল্লীত ইয়াৰ সম্পূৰ্ণ বিপৰীত। শিক্ষা খণ্ডত অনুশাসন অনাৰ বাবে অভিভাৱকসকলে আম আদমি পাৰ্টিৰ (Aam Admi Party) উপ-মুখ্যমন্ত্ৰী মনীষ ছিছোদিয়াক (Manish Sisodia) ধন্যবাদ জনায়।
কিন্তু চিবিআইয়ে আবকাৰী নীতিত গাফিলতিৰ অভিযোগত গ্ৰেপ্তাৰ কৰিছে সেই ছিছোদিয়াক। ইয়াৰ পিছতে দিল্লীৰ বিদ্যালয়ত ‘আই লাভ মনীষ ছিছোদিয়া’ বেনাৰ ওলোমাই প্ৰচাৰ আৰম্ভ কৰে আপে। শিশু আৰু কিশোৰ-কিশোৰীকো এই প্ৰচাৰত অন্তৰ্ভুক্ত কৰা হৈছে, যাৰ বাবে বিৰোধী দল বিজেপিয়ে তীব্র সমালোচনা কৰিছে।
চৰকাৰী বিদ্যালয়সমূহত ছিছোদিয়াৰ বাবে আপে প্ৰচাৰ চলাবলৈ আৰম্ভ কৰে। বিভিন্ন বিদ্যালয়ত প্ৰৱেশ কৰাৰ পিছত বেনাৰ ওলোমাই বহিছে আপ কৰ্মীসকলে। একাংশ বিদ্যালয়ে ছিছোদিয়াৰ গ্ৰেপ্তাৰক গৰিহণা দি স্বাক্ষৰ সংগ্ৰহ কৰিছে।
বহু বিদ্যালয়ত ছাত্ৰ-ছাত্ৰীকো শ্লোগান দিয়া দেখা হৈছে। মন্ত্ৰী আতিশীকে ধৰি আপৰ নেতাই এনে ছবিৰে ছচিয়েল মিডিয়াত দাবী কৰিছে, এয়া ছাত্ৰ-ছাত্ৰীৰ বিশুদ্ধ মনীষ-প্ৰেম। ছিছোদিয়াক জে’লত ভৰালেও এই প্ৰেম পাহৰিব নোৱাৰি। আৰু বিজেপিৰ অভিযোগ- আপে স্কুলীয়া ছাত্ৰ-ছাত্ৰীক লৈ লেতেৰা ৰাজনীতি কৰিছে।
উচ্চতম ন্যায়ালয়ৰ মুখ্য ন্যায়াধীশৰ বিচাৰপীঠে ছিছোদিয়াক তেওঁৰ আবেদনৰ শুনানি নোপোৱাৰ পিছত নিম্ন আদালতত জামিন আবেদন দাখিল কৰিবলৈ পৰামৰ্শ দিয়ে। সেই পৰামৰ্শ অনুসৰণ কৰি আজি নিম্ন আদালতত জামিনৰ বাবে আবেদন জনায় ছিছোদিয়াৰ অধিবক্তাই।
