সপোন নগৰী মুম্বাইত (Mumbai) কালি অসম চৰকাৰৰ পৰ্যটন বিভাগৰ (Tourism Department) তৰফৰ পৰা এক ৰোড শ্ব’ (Road Show) অনুষ্ঠিত হয়। এই ৰোড শ্ব’টোক লৈ গৌৰৱান্বিত অনুভৱ কৰা বুলি প্ৰকাশ কৰে পৰ্যটন বিভাগৰ মন্ত্ৰী জয়ন্ত মল্ল বৰুৱা (Jayanta Malla Baruah) আৰু অসম পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱাই (Rituparna Baruah)।
আমাৰ ৰাজ্যৰ প্ৰাকৃতিক দৃশ্যসমূহেৰে দেশী-বিদেশী জনসাধাৰণ সকলক আকৰ্ষণ কৰাৰ উদ্দেশ্যৰে এই ৰোড শ্ব’টি অনুষ্ঠিত কৰা হৈছিল। আমি সকলো জ্ঞাত যে, আমাৰ অসম (Assam) খন প্ৰাকৃতিক সৌন্দৰ্য্যৰে পৰিপূৰ্ণ। য’লৈকে যোৱা হয় তাতেই এই সুন্দৰতাই বিৰাজ কৰিছে। অসম পৰ্যটন উন্নয়ন নিগমৰ ঋতুপৰ্ণ বৰুৱাই নিজৰ ছ’চিয়েল মিডিয়াত (Social Media) নিজেই লিখিছে যে, আমাৰ অসমখনক প্ৰকৃতিয়ে অকৃপণ ভাৱে দান দিছে। এয়া একেবাৰেই সঁচা কথা।
ইতিমধ্যে বহু পৰিচালক তথা নিৰ্মাতা গোষ্ঠীয়ে তেওঁলোকৰ চিনেমা তথা বিভিন্ন প্ৰকল্প সমূহৰ বাবে আমাৰ অসমৰ বিভিন্ন ঠাইত শ্বুটিং কৰিছে। সেয়েহে, এই ৰোড শ্ব’টোৰো অন্যতম উদ্দেশ্য আছিল যে আমাৰ অসমখন শ্বুটিং স্পট হিচাবে এখন উৎকৃষ্ট ঠাই বুলি সকলোৰে ওচৰত প্ৰদৰ্শন কৰা।
মুম্বাইত অনুষ্ঠিত এই ৰোড শ্ব’ তথা বি২বি বৈঠকত বিভিন্ন গৰাকী পৰিচালক-প্ৰযোজক লগতে ব্যৱসায়ী, বিভিন্ন খ্যাতনাম প্ৰতিষ্ঠান ইত্যাদিয়ে অংশগ্ৰহণ কৰে। আন্তঃৰাষ্ট্ৰীয় পৰ্যায়ত বহুলভাৱে সমাদৰ লাভ কৰা জনপ্ৰিয় অভিনেতা আদিল হুচেইনে (Adil Hussain) বি২বি বৈঠকৰ পেনেল ডিছকাচন মডাৰেট কৰে। আনহাতে, পৰিচালক তথা প্ৰযোজক মহেশ মাঞ্জেৰকাৰ (Mahesh Manjrekar), চাংকী পাণ্ডেকে (Chunky Pandey) আদি কৰি ইয়াত বিশিষ্ট কণ্ঠশিল্পী অংগৰাগ পাপন মহন্তও (Angarag papon Mahanta) উপস্থিত থাকে।
