তেলেংগানাৰ (Telengana) ৰাজধানী হায়দৰাবাদত (Hyderabad) বহুমহলীয়া অট্টালিকাৰ অগ্নিকাণ্ডত কমেও ৬ জন লোকৰ মৃত্যু হয়। বৃহস্পতিবাৰে নিশা কেইবাখনো অগ্নিনিৰ্বাপক বাহিনীৰ গাড়ীয়ে অগ্নিকাণ্ডৰ তথ্য লাভ কৰি সেই স্থানত উপস্থিত হয়। অট্টালিকাৰ পঞ্চম মহলাৰ পৰা ৭ জন লোকক উদ্ধাৰ কৰা হয়।
কিন্তু গোটেই নিশা চেষ্টা অব্যাহত ৰখাৰ পাছতো জুই সম্পূৰ্ণৰূপে নিয়ন্ত্ৰণ কৰিব পৰা নগʼল। এই প্ৰতিবেদন লিখাৰ সময়ত একাংশ লোক বহুমহলীয়া অট্টালিকাটোত আবদ্ধ হৈ পৰাৰ আশংকা কৰা হৈছে। ফলত মৃতকৰ সংখ্যাও বৃদ্ধি পোৱাৰ আশংকা কৰা হৈছে। হায়দৰাবাদৰ উপায়ুক্ত চন্দনা দীপ্তীয়ে (Chandana Dipti) কয় যে বহুমহলীয়া অট্টালিকাৰ অগ্নিকাণ্ডত দুগৰাকী মহিলাকে ধৰি ছয়জন লোকৰ মৃত্যু হৈছে।
আৰক্ষী আৰু অগ্নিনিৰ্বাপক বাহিনীয়ে জানিব পাৰিছে যে স্বপ্নালোক কমপ্লেক্স (Swapnalok Complex) নামৰ বহুমহলীয়া অট্টালিকাটোৰ পঞ্চম মহলাত প্ৰথমটো অগ্নিকাণ্ড সংঘটিত হয়। অগ্নিকাণ্ডৰ কাৰণ জানিবলৈ আৰম্ভ হৈছে তদন্ত। আৰক্ষীয়ে জনোৱা মতে, ঘটনা সন্দৰ্ভত তথ্য লাভ কৰাৰ পিছতে ১০খন অগ্নিনিৰ্বাপক বাহিনীৰ গাড়ী আহি উপস্থিত হৈ জুই নিৰ্বাপন কৰিবলৈ আৰম্ভ কৰে।
