বাৰাণসী অভিমুখী বিমানে হায়দৰাবাদত জৰুৰীকালীন অৱতৰণ (emergency landing in Hyderabad) কৰে। যান্ত্ৰিক বিজুতিৰ বাবে পাইলটে এই সিদ্ধান্ত লʼবলৈ বাধ্য হয়। মঙলবাৰে পুৱা যাত্ৰীসহ বিমানখন হায়দৰাবাদ বিমানবন্দৰত অৱতৰণ কৰে।
অসামৰিক বিমান পৰিবহণ সঞ্চালকালয়ে জনোৱা মতে, বাৰাণসী অভিমুখী বিমানখন (Varanasi-bound flight) যান্ত্ৰিক বিজুতিৰ বাবে গন্তব্য স্থান পোৱাৰ পূৰ্বে অন্য বিমানবন্দৰলৈ অৱতৰণ কৰিবলগীয়া হয়। অৱশ্যে বিমানখনৰ সকলো যাত্ৰী সুৰক্ষিত। তেওঁলোক নিৰাপদ।
মঙলবাৰে পুৱা বেংগালুৰুৰ পৰা বাৰাণসীলৈ ৰাওনা হয় ইণ্ডিগো (Indigo)ৰ 6E897 বিমানখন। কিন্তু কিছু সময় আকাশত উৰামৰাৰ পাছত পাইলটে এটা যান্ত্ৰিক সমস্যা লক্ষ্য কৰে। ফলত খৰখেদাকৈ বিমানখন অৱতৰণ কৰাৰ সিদ্ধান্ত লোৱা হয়। তাৰ পিছত নিকটতম হায়দৰাবাদ বিমানবন্দৰ কৰ্তৃপক্ষৰ সৈতে যোগাযোগ কৰা হয়। বিমানবন্দৰৰ সূত্ৰ অনুসৰি, বিমানখনত ১৩৭ জন যাত্ৰী আছিল। বিমানখনে মঙলবাৰে পুৱা প্ৰায় ৬.১৫ বজাত হায়দৰাবাদৰ মাটি স্পৰ্শ কৰে।
বাৰাণসীলৈ যাত্ৰীসকলৰ বাবে বিকল্প ব্যৱস্থা কৰা হৈছে। বিমানখনৰ ঠিক কি সমস্যা আছিল, যাত্ৰীসকল কিয় এই হাৰাশাস্তিৰ সন্মুখীন হʼবলগীয়া হৈছিল, সেই বিষয়ে তদন্ত কৰা হʼব। অৱশ্যে ইণ্ডিগোই এই সন্দৰ্ভত এতিয়াও একো অৱগত কৰা নাই।
