ষ্টাফ ৰিপ’ৰ্টাৰ,ডিফু:পশ্চিম কাৰ্বি আংলঙৰ অসম-মেঘালয় সীমান্তত সৃষ্টি হোৱা শেহতীয়া পৰিস্থিতিক লৈ ডিফুত শনিবাৰে কাৰ্বি আংলঙৰ সকলো ৰাজনৈতিক দল, ছাত্ৰ সংগঠন, অন্যান্য সামাজিক-সাংস্কৃতিক সংগঠনৰ উপৰি প্ৰাক্তন সাংসদ, বিধায়কসকলৰ লগতে নেতৃস্থানীয় ব্যক্তিসকলক লৈ এখন গুৰুত্বপূৰ্ণ বৈঠক অনুষ্ঠিত হৈ যায়।
কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ অধ্যক্ষতাত অনুষ্ঠিত এই বৈঠকত উপস্থিত সকলোৱে শেহতীয়া ঘটনা প্ৰৱাহক প্ৰতিহত কৰাৰ বাবে মন্তব্য আগবঢ়ায়।দিনৰ ১১ বজাৰ পৰা ৬ ঘণ্টা সময়জুৰি এই বিষয়ত আলোচনা অনুষ্ঠিত হোৱা দেখা যায়।
সীমান্তৰ সমস্যা সমাধানৰ বাবে ৰাজ্য চৰকাৰে মন্ত্ৰী পীযুষ হাজৰিকাৰ অধ্যক্ষতাত গঠন কৰি দিয়া সমিতিখনে বিষয়টো আলোচনাৰ মাজেৰে নিষ্পত্তি কৰিব লাগে বুলি আজিৰ বৈঠকে মন্তব্য আগবঢ়ায়।এই সমিতিখনত পশ্চিম কাৰ্বি আংলঙৰ মেঘালয় সীমান্তৱৰ্তী কাৰ্বি আংলং স্বায়ত্ত পৰিষদৰ আমৰেং, ছচেং, চিণ্ঠং আৰু আমৰি সমষ্টিৰ নিৰ্বাচিত প্ৰতিনিধিসকল অন্তৰ্ভুক্ত হৈ আছে।
অসম-মেঘালয় আৰু অসম-নগালেণ্ডৰ আন্তঃৰাজ্যিক সীমা সমস্যা সমাধানৰ বাবে সীমান্তত বসবাস কৰা সকলো ৰাজনৈতিক দলৰ সদস্যক লৈ Border Protection Vigilance Committee গঠন কৰা হয়।
এই সমিতিসমূহে সীমান্তৰ সমস্যা সন্দৰ্ভত আলোচনাৰ মৰ্মে গ্ৰহণ কৰা সিদ্ধান্তসমূহ কাৰ্বি আংলং স্বায়ত্তশাসিত পৰিষদক অৱগত কৰিব। পৰিষদে এই সন্দৰ্ভত সকলোধৰণৰ সহযোগিতা আগবঢ়াব।মুখ্যমন্ত্ৰী ডঃ হিমন্তবিশ্ব শৰ্মাৰ সৈতেও সীমান্তৰ সমস্যা সন্দৰ্ভত জিলাখনৰ সকলো ৰাজনৈতিক দলৰ নেতৃত্বই আলোচনাত বহাৰ পোষকতা কৰে।
ৰাজ্যিক সীমা সমস্যা সমাধানৰ বাবে Give & Take নীতি সন্দৰ্ভত কোনো সিদ্ধান্ত হোৱা নাই বুলি অৱগত কৰে কাৰ্বি আংলং পৰিষদৰ মুখ্য কাৰ্যবাহী সদস্যগৰাকীয়ে।জিলাখনৰ সৰ্বদলীয় নেতৃত্বই আৰু ৰাজ্য চৰকাৰক সাক্ষাৎ কৰি চৰকাৰৰ Give & Take নীতিৰ বিৰুদ্ধাচৰণ কৰিবলৈ পৰামৰ্শ আগহঢ়ায় ASDC দলৰ প্ৰতিনিধিয়ে। এই সন্দৰ্ভত কাৰ্বি আংলং স্বায়ত্তশাসিত পৰিষদে বিশেষ অধিৱেশন অনুষ্ঠিত কৰি প্ৰস্তাৱ গ্ৰহণ কৰিবলৈয়ো পৰামৰ্শ আগবঢ়োৱা হয়।
