ASSAM TIMES POST
নতুন দিল্লীঃ প্ৰধান মন্ত্ৰী নৰেন্দ্ৰ মোডীৰ অধ্যক্ষতাত বুধবাৰে অনুষ্ঠিত কেন্দ্ৰীয় কেবিনেটত নাগৰিকত্ব সংশোধনী বিধেয়ক, ২০১৯ক সংসদত উত্থাপিত কৰিবলৈ সেউজ সংকেত প্ৰদান কৰা হয়। চৰকাৰৰ এগৰাকী জ্যেষ্ঠ বিষয়াই ৰাষ্ট্ৰীয় পৰ্যায়ৰ সংবাদ মাধ্যমক জনোৱা অনুসৰি, বুধবাৰে অনুষ্ঠিত কেন্দ্ৰীয় কেবিনেটৰ মুখ্য বিষয় আছিল এই নাগৰিকত্ব সংশোধনী বিধেয়কখন। ইয়াত বিধেয়কখনক সংসদলৈ আগবঢ়াই দিয়া হয়। তেওঁ সদৰী কৰা মতে, অহা ৯ ডিচেম্বৰত বিধেয়কখন সদনত উত্থাপন কৰা হ’ব। উল্লেখ্য যে অহা ১৩ ডিচেম্বৰত সংসদৰ শীতকালীন অধিৱেশনৰ সামৰণি পৰিব। ইতিমধ্যে, বিধেয়কখন সংসদত উত্থাপন হ’বলগীয়া দিনটোত ভাৰতীয় জনতা পাৰ্টিকে প্ৰমুখ্য কৰি ৰাষ্ট্ৰীয় গণতান্ত্ৰিক মৰ্চা চমুকৈ এনডিএৰ অংশীদাৰ দলসমূহৰ যাতে প্ৰতিজন সাংসদ সংসদত উপস্থিত থাকে, সেই সম্পৰ্কত নিৰ্দেশনা প্ৰদান কৰা হৈছে।
