ভাৰতত এই বিষয়ে কিছুদিন ধৰি চৰ্চা চলি আহিছে। আনহাতে, বিদেশত ইয়াৰ ব্যৱহাৰ আৰম্ভ হৈছে। এইবাৰ ভাৰতত হ’ল তাৰ প্ৰয়োগ। ওড়িশাৰ এটা ব্যক্তিগত নিউজ চেনেল ওড়িশা টিভিয়ে (Odisha TV) দেওবাৰে মুকলি কৰে এআইৰ দ্বাৰা নিৰ্মিত ‘লিজা’ নামৰ নিউজ এংকৰ (‘Liza’, a news anchor created by AI)। কোম্পানীটোৰ এক বিবৃতিত কোৱা হৈছে যে ওড়িশাৰ হেণ্ডলুম শাৰী পিন্ধা এগৰাকী কৃত্ৰিম মহিলাই অʼটিভি নেটৱৰ্কৰ টেলিভিছন আৰু ডিজিটেল প্লেটফৰ্মৰ বাবে ওড়িয়া আৰু ইংৰাজী দুয়োটা ভাষাতে বাতৰি উপস্থাপন কৰিব।
কোম্পানীটোৰ বিবৃতি অনুসৰি, অʼটিভিয়ে ওড়িয়া টেলিভিছন সাংবাদিকতাক প্ৰথম আৰ্টিফিচিয়েল ইনটেলিজেন্স (এআই) নিউজ এংকৰ লিজাক (First Artificial Intelligence News Anchor LIZA) উপহাৰ দিছে বুলিও কয়।
যদিও লিজাই বহু ভাষাত কথা কʼব পাৰে, সম্প্ৰতি তেওঁ নেটৱৰ্কৰ টেলিভিছন আৰু ডিজিটেল প্লেটফৰ্মৰ বাবে কেৱল ওড়িয়া আৰু ইংৰাজী ভাষাতহে বাতৰি উপস্থাপন কৰিব।তেওঁলোকৰ মতে, “অনাগত দিনত লিজাক ওড়িয়াত অধিক দক্ষ কৰি তোলাৰ প্ৰচেষ্টা চলি আছে। আপুনি লিজাক ইনষ্টাগ্ৰাম, ফেচবুক আদিৰ দৰে সকলো বিশিষ্ট ছচিয়েল মিডিয়া প্লেটফৰ্মত বিচাৰি পাব আৰু অনুসৰণ কৰিব পাৰে।”
কোম্পানীটোৰ ডিজিটেল বিজনেছ হেড লিটিছা মাংগাট পাণ্ডাই কয়, “লিজাক ওডিয়াত প্ৰশিক্ষণ দিয়াটো এক জটিল কাম আছিল, যʼত আমি সফলতা লাভ কৰিব পাৰিলোঁ।”তেওঁ লগতে কয়, “অৱশ্যে আমি এতিয়াও ইয়াৰ ওপৰত কাম কৰি আছো। আমি আশা কৰিছো যে তেওঁক এনে এটা স্তৰলৈ প্ৰশিক্ষণ দিয়া হ’ব, য’ত তেওঁ আনৰ সৈতে সহজে মত বিনিময় কৰিব পাৰিব।”
