সাত মাহৰ অপেক্ষাৰ অন্ত পেলাই পুনৰ ডাঙৰ পৰ্দালৈ উভতিছে শ্বাহৰুখ খান (Shah Rukh Khan)। ‘পাঠান’ (Pathan)ৰ পিছত এইবাৰ পুনৰ একচন ধৰ্মী ছবি ‘জোৱান’ (Jawan)। শ্বাহৰুখৰ ‘পান ইণ্ডিয়ান’ ছবি ‘জোৱান’ বৃহস্পতিবাৰে হিন্দী ভাষাৰ লগতে তামিল আৰু তেলেগু ভাষাতো মুক্তিলাভ কৰে। এই ছবিখনৰ জৰিয়তে বলিউডত অভিষেক ঘটে তামিল পৰিচালক এটলীৰ।
লগতে দক্ষিণ ভাৰতীয় উদ্যোগৰ অভিনেত্ৰী নয়নতৰা (Actress Nayantara) আৰু তামিল অভিনেতা বিজয় ছেঠুপাঠীৰো অভিষেক। বলীউডৰ অভিনেত্ৰী দীপিকা পাডুকনৰ কেমিঅʼ ৰোল। মুঠতে বলীউডৰ সৈতে দক্ষিণৰ সংযোগ। সাত মাহ পূৰ্বে শ্বাহৰুখে যেনেদৰে ‘পাঠান’ত ধুমুহাৰ সৃষ্টি কৰিছিল, সেই ধুমুহাই ‘জোৱান’ক উৰুৱাই লৈ যাব নে এইবাৰ শ্বাহৰুখে ঘূৰ্ণীবতাহৰ সৃষ্টি কৰিব? এতিয়া সকলোৰে মনত একেটা প্ৰশ্ন।
‘জোৱান’ৰ মূল কাহিনীটো দুটা ভিন্ন সময়ৰ প্ৰসংগক কেন্দ্ৰ কৰি। বিক্ৰম ৰাথোৰ আৰু আজাদৰ জীৱন কাহিনী। ‘জোৱান’ হৰজিতে তেওঁলোকক বিচাৰি পোৱা কাহিনীৰ আধাৰত ৰচনা কৰা হৈছে। ছবিখন আৰম্ভ হোৱাৰ আগতেই এটলিয়ে নিজৰ স্বকীয়তা প্ৰমাণ কৰিছে। প্ৰতিটো ফ্ৰেমৰ নিজৰ স্পৰ্শ থাকে, দক্ষিণৰ স্পৰ্শৰ সৈতে। অনিৰুদ্ধ ৰবিচন্দ্ৰৰ বিস্ময়কৰ বেকগ্ৰাউণ্ড মিউজিক বা বিজিএমৰ লগত সংযোজন কৰা হৈছে।
‘জোৱান’ৰ আৰম্ভণিৰ ক্ৰমৰ পৰা আৰম্ভ কৰি কেমেৰাৰ কাম, ধীৰ গতি ৰ একচন দৃশ্য, ছাঁ-পোহৰৰ খেল, বিজিএম— এই সকলোবোৰেই দৰ্শকক নিমিষতে মন্ত্ৰমুগ্ধ কৰিবলৈ যথেষ্ট। উচ্চ আৰু নিম্ন শ্ৰেণীৰ পাৰ্থক্যৰ পৰা আৰম্ভ কৰি ‘জোৱান’তো সামাজিক বাৰ্তাৰ উন্মেষ ঘটে।
যদি একচন ছিকুৱেন্সক সিদ্ধাৰ্থ আনন্দৰ পৰিচালিত ‘পাঠান’ৰ সৈতে তুলনা কৰিব যোৱা হয়, তেন্তে সেই ক্ষেত্ৰত ‘জোৱান’ হাজাৰ খোজ আগুৱাই গৈছে। ছবিখনত শ্বাহৰুখে বিক্ৰম আৰু আজাদৰ চৰিত্ৰত অভিনয় কৰিছে। কেতিয়াবা চুলিবিহীন অৱস্থাত, কেতিয়াবা চিত্ৰনাট্যৰ প্ৰয়োজনৰ বাবে বুঢ়াৰ সাজ পিন্ধি পৰ্দাত ধৰা দিছে অভিনেতাজনে। প্ৰতিটো ‘লুক’ত শ্বাহৰুখ অনবদ্য। কেতিয়াবা নয়নতৰাৰ লগত যোৰা পাতিছে, কেতিয়াবা আকৌ দীপিকাৰ লগত। দক্ষিণৰ অভিনেত্ৰী হিচাপে বলীউডত অভিষেক ঘটিছে নয়নতৰাৰ। অভিনয়ৰ ভাষিক পাৰ্থক্যৰ বাবে তেওঁৰ মাজত কোনো জড়তা দেখা যোৱা নাই। বৰঞ্চ তেওঁৰ সাৱলীল অভিনয় সঁচাকৈয়ে প্ৰশংসনীয়।
খলনায়ক হিচাপে বিজয় সেঠুপাঠী উপযুক্ত। যদিও দক্ষিণৰ অভিনেতা হিচাপে এয়া তেওঁৰ প্ৰথম বলীউডৰ কাম, বিজয়ক ইয়াৰ পূৰ্বে হিন্দীত অভিনয় কৰা দেখা গৈছে। এইবাৰ অʼটিটি প্লেটফৰ্মত মুক্তি পালে ৱেব ছিৰিজ ‘ফাৰ্জী’। বিজয়ে এই ধাৰাবাহিকখনত অভিনয় কৰিছিল। অভিনেতা হিচাপে প্ৰথম শ্রেণীৰ তেওঁ৷ কিন্তু কেমেৰাত ধৰা পৰিছে যে তেওঁ হিন্দী ভাষাত বৰ সাৱলীল নহয়। ‘ফাৰ্জী’ত যি জড়তা দেখা গৈছিল, সেই জড়তা ‘জোৱান’ত নাইকিয়া হৈ গৈছে। এই ছবিখনত বিজয়ে খলনায়কৰ চৰিত্ৰত নিজৰ মতে অভিনয় কৰিছে। অৱশ্যে ছবিখনৰ প্ৰথমাৰ্ধৰ তুলনাত বিজয়ে দ্বিতীয়াৰ্ধত নিজকে উদঙাই দিছে।
দীপিকাই কেমিঅʼ ৰোল কৰিছে যদিও স্ক্ৰীণ টাইম বেছি পোৱা নাই। কিন্তু সেইখিনি সময়ৰ ভিতৰতে তেওঁ শক্তিশালী অভিনয়ৰ জৰিয়তে দৰ্শকৰ মনত স্থান দখল কৰিব। নাৰী চৰিত্ৰত প্ৰিয়মণি, চোনিয়া মালহোত্ৰা, সঞ্জিতা ভট্টাচাৰ্য, লেহৰ খান আদিয়ে অভিনয় কৰিছে। পাৰ্শ্ব চৰিত্ৰ হʼলেও চৰিত্ৰবোৰ সকলো সমানে গুৰুত্বপূৰ্ণ।
একচন, পাঞ্চ ডাইলগ, হাস্যৰস, ৰোমাঞ্চ— মুঠতে এটলিয়ে ইয়াত যথেষ্ট ভালদৰে মচলা দিছে। যদিও ছবিখন প্ৰায় তিনি ঘণ্টাৰ, তথাপিও ‘জোৱান’ৰ গতি লেহেমীয়া হোৱা নাই এক মুহূৰ্তৰ বাবেও। সময়ে সময়ে উত্তেজনাৰ সৃষ্টি কৰাত এটলি নিপুণ। ‘থেদি’, ‘মাৰ্শ্বেল’, ‘বিজিল’ ছবিতো তেওঁ নিজৰ চাপ বহুৱাই থৈ গৈছে। অনিৰুদ্ধয়ো দুহাত ভৰি নিজৰ যাদু ঢালিছে ‘জোৱান’ত।
ছবিখন মুক্তি পোৱাৰ পূৰ্বে দৰ্শকৰ এটা অংশই দাবী কৰিছিল যে ছবিখনৰ সকলো চমক প্ৰথম ফ্লেছতে প্ৰকাশ পাইছে। গতিকে ছবিখনৰ বাবে কি বাকী আছে? কিন্তু যʼত পৰিচালক এটলী আৰু অভিনেতা শ্বাহৰুখ, তাত আচৰিত নোহোৱাৰ কথাই নাই! ‘জোৱান’ৰ কিছু চৰিত্ৰ সযতনে লুকুৱাই ৰাখিছে এটলীয়ে যিটো দৰ্শকৰ বাবে ‘আশ্বৰ্যকৰ’।
