কাৰ্বি সাংস্কৃতিক সমাজ ( কাৰ্বি কালছাৰেল চচাইটি) (Karbi Cultural Society) ৰ উদ্যোগত আজি ডিফু ৰংনিহাঙৰ কাৰ্বি ক্লাৱৰ প্ৰাংগণত দিন জোৰা কাৰ্যসূচীৰে ডিফুত প্ৰথম 1974 , দ্বিতীয় 1975 , তৃতীয় 1976 , দশম 1984 আৰু এয়োদশ 1987 চনত অনুষ্ঠিত হোৱা কাৰ্বি যুৱ মহোৎসৱৰ আয়োজক আদৰণি সমিতিৰ কৰ্ম কৰ্তা সকলক কাৰ্বি প’হ আৰু প্ৰশস্তি পত্রৰে সম্বৰ্দ্ধনা জনোৱা হয়।
এই উপলক্ষে কাৰ্বি সাংস্কৃতিক সমাজৰ কেন্দ্ৰীয় সমিতিৰ সভাপতি চন্দ্ৰছিং ক্রয়ে আত ধৰা অনুষ্ঠানত মুখ্য অতিথি হিচাপে অংশ লোৱা কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে কয় যে স্বকীয় ভাষা, ক’লা কৃষ্টি, সাজপাৰে জাতিটোৰ পৰিচয়।
প্ৰথম কাৰ্বি যুৱ মহোৎসৱৰ অনুষ্ঠান ডিফুৰ কাৰ্বি ক্লাৱত 1974 চনত আৰম্ভ হৈছিল। এই দিনটো জিলাখনত উল্লেখনীয় দিন বুলি উল্লেখ কৰি মুখ্য কাৰ্যবাহী সদস্য গৰাকীয়ে কাৰ্বি আংলং স্বায়ত্তশাসিত পৰিষদৰ কেলেন্ডাৰত কাৰ্বি যুৱ মহোৎসৱৰ আৰম্ভৰ প্ৰথম দিনটো বন্ধৰ দিন হিচাপে বিবেচনা কৰা হব বুলি তেওঁ মন্তব্য কৰে। ডিফুত পাঁচ বাৰ কাৰ্বি যুৱ মহোৎসৱৰ আয়োজক সমিতিৰ কৰ্মকৰ্তা সকলক আমন্ত্ৰিত অতিথিৰ দ্বাৰা সম্বৰ্দ্ধনা জনোৱা উপৰি অভিনন্দন জ্ঞাপন কৰে।
কাৰ্বি সাংস্কৃতিক সমাজৰ সোণ্লী জয়ন্তী উৎযাপনৰ বৰ্ষৰ লগত সংগতি ৰাখি কাৰ্বি যুৱ মহোৎসৱৰ আয়োজক সমিতিৰ কৰ্মকৰ্তা সকলক সম্বৰ্দ্ধনা জনোৱা কাৰ্যসূচী গ্ৰহণ কৰা হৈছে বুলি কাৰ্বি সাংস্কৃতিক সমাজৰ সভাপতি চন্দ্ৰছিং ক্র’য়ে সভাত ভাষণত উল্লেখ কৰে।
অনুষ্ঠানত কাৰ্যবাহী সদস্য সূৰ্য ৰংফাৰ, কাৰ্বি লামমেত আমেইৰ সম্পাদক জয়ছিং তকবি, লোক সংস্কৃতি গৱেষক লুনছে তিমুঙেও চমু ভাষণ আগবঢ়ায়।
