অবৈধ ড্ৰাগছ, মৰফিন, গাঞ্জা, বাৰ্মিজ চুপাৰিৰ পিছত কাৰবি আংলং জিলাৰ অসম-নাগালেণ্ড সীমান্তৰ খটখটীত (Khatkhati) এইবাৰ উদ্ধাৰ হৈছে প্ৰায় ৫০ লক্ষ্যাধিক টকাৰ অবৈধ বাৰ্মিজ উইংগ চিগাৰেট (Illegal Burmese Wing Cigarette Rescue)৷ খটখটী এছবিআই বেংকৰ সন্মূখত আৰক্ষীৰ নিয়মীয়া নাকা তালাচীত উদ্ধাৰ হয় এই বৃহৎ পৰিমাণৰ অবৈধ চিগাৰেটখিনি৷ খটখটী থানা (Khatkhati Police Station)ৰ অ’চি ৰমেন বৰদলৈৰ নেতৃত্বত এছআই পি স্বমধন স্বৰ্গীয়াৰী আৰু এএছআই টিকাৰাম বৰাৰী আৰু থানা ষ্টাফৰ সহযোগত চলিছিল অভিযান ৷
প্ৰাপ্ত খবৰ অনুসৰি শনিবাৰে বিয়লি প্ৰায় ১ বাজি ৩০ মিনিটত মণিপুৰৰ পৰা দিল্লী অভিমুখে গৈ থকা UP 21 BN 1586 নম্বৰৰ এখন কণ্টেইনাৰ গাড়ীত তালাচী চলাওতে বাহনখনত গোপন চেম্বাৰ বনাই লুকুৱাই অনা অৱস্থাত উদ্ধাৰ হয় চিগাৰেটখিনি ৷ ৬৩ টা কাৰ্টুন আৰু ১০৪৪টা পেকেটত আছিল অবৈধ চিগাৰেটখিনি৷
এই সন্দৰ্ভত আৰক্ষীয়ে উত্তৰ প্ৰদেশৰ মুৰাদাবাদ জিলাৰ কাজী পুৰী গাঁৱৰ মহচিন খানক আটক (Mohsin Khan arrested) কৰি অধিক তথ্যৰ বাবে জেৰা অব্যাহত ৰাখিছে বুলি জানিব পৰা গৈছে৷ খটখটী আৰক্ষীৰ এনে সফলতাত সচেতন মহলে শলাগ লৈছে ৷ উদ্ধাৰ হোৱা অবৈধ বাৰ্মিজ চিগাৰেটখিন বোকাজান মহকুমা আৰক্ষী বিষয়া ৰুস্তমৰাজ ব্ৰহ্ম আৰু নিৰপেক্ষ সাক্ষীৰ সাক্ষাতে জব্দ কৰা হৈছে বুলি জানিব পৰা গৈছে৷
