পথৰ কাষৰ পাহাৰীয়া অৰণ্যৰ পৰা নিৰ্বিচাৰে গুলীবৰ্ষণ কৰাত আৰক্ষী কমাণ্ডোৱেও উচিত প্ৰত্যুত্তৰ দিয়ে। সন্ত্ৰাসবাদী পাহাৰৰ ওপৰত থকাৰ বাবে কমাণ্ডোসকলৰ সকলো গতিবিধি লক্ষ্য কৰিব পৰিছিল। ফলত তেওঁলোকৰ ওপৰত গুলীচালনা কৰা সহজ হৈছিল। কিন্তু কমাণ্ডোসকলক বচাবলৈ আগবাঢ়ি আহে অসম ৰাইফলছৰ জোৱান। উগ্ৰপন্থীৰ আক্ৰমণ চলি থকাৰ সময়তে তেওঁলোকে কমাণ্ডোসকলক উদ্ধাৰ কৰে। শ্বাসৰুদ্ধকৰভাৱে উদ্ধাৰ কৰা ভিডিঅ’ মুকলি কৰা হৈছে।
৩১ অক্টোবৰত এই ঘটনা সংঘটিত হোৱা বুলি দাবী কৰা হৈছে। উগ্ৰপন্থীয়ে গুলীয়াই হত্যা কৰাৰ পিছতে ৰাজ্য আৰক্ষীৰ কমাণ্ডোসকলে মণিপুৰ আৰক্ষী (Manipur Police)ৰ এজন শীৰ্ষ বিষয়াৰ সন্ধানত আছিল। ইম্ফলৰ পৰা ১১৫ কিলোমিটাৰ নিলগৰ ভাৰত-ম্যানমাৰ সীমান্তত টহল দি আছিল দলটোৱে। সেই সময়ত উগ্ৰপন্থীয়ে পাহাৰৰ ওপৰৰ পৰা ঘাইপথত কমাণ্ডো কনভয়ক আক্ৰমণ (Militants attack commando convoy on highway from hilltop) কৰে। তেওঁলোকৰ আক্ৰমণৰ সন্মুখত কমাণ্ডো বাহিনীয়েও উত্তৰ দিয়ে। দুয়োপক্ষৰ মাজত ব্যাপক সংঘৰ্ষ সংঘটিত হয়।
আৰক্ষীৰ সূত্ৰ অনুসৰি, উগ্ৰপন্থীয়ে পাহাৰৰ ওপৰত থকাৰ বাবে অধিক সুবিধা লাভ কৰিছিল। কমাণ্ডোসকলৰ সকলো গতিবিধি লক্ষ্য কৰি আছিল আৰু তেওঁলোকক আক্ৰমণ কৰিছিল। সেই সময়ত অসম ৰাইফলছৰ এণ্টি মাইন বাহনে উক্ত ঘাইপথত টহল দি আছিল। কমাণ্ডো আৰু উগ্ৰপন্থীৰ মাজত হোৱা সংঘৰ্ষ চকুত পৰাৰ লগে লগে অসম ৰাইফলছৰ জোৱানসকলে ‘কভাৰ আপ’ কৰে। মাইন প্ৰতিৰোধী বাহনৰ পৰা উগ্ৰপন্থীৰ ওপৰত গুলীচালনা আৰম্ভ কৰে। লগতে তেওঁলোকে ইজনৰ পিছত সিজনকৈ কমাণ্ডোসকলক উদ্ধাৰ কৰে।
“ওপৰৰ ফালে ওপৰৰ ফালে” অসম ৰাইফলছৰ এজন জোৱানে পাহাৰৰ ফালে আঙুলিয়াই দিয়া শুনা যায়। ইয়াৰ পিছতে অসম ৰাইফলছৰ মাইন প্ৰতিৰোধী বাহনসমূহক লক্ষ্য কৰি গুলীবৰ্ষণ কৰে। অসম ৰাইফলছৰ জোৱানেও প্ৰত্যুত্তৰত গুলীচালনা কৰে। কিছুসময় ধৰি দুয়োপক্ষৰ মাজত সংঘৰ্ষ চলি থাকে। ইয়াৰ পিছত মণিপুৰ আৰক্ষীৰ কমাণ্ডোক তাৰ পৰা উদ্ধাৰ কৰি লৈ যোৱা হয়। ভিডিঅʼটোত দেখা গৈছে কেইবাজনো কমাণ্ডোক ৰক্তাক্ত অৱস্থাত উদ্ধাৰ কৰা হৈছে। কমাণ্ডোসকলক তেজেৰে লুতুৰি-পুতুৰি অৱস্থাত চিকিৎসালয়ত ভৰ্তি কৰোৱা হয়। আক্ৰমণত তিনিজন আৰক্ষী আহত হোৱা বুলি জানিব পৰা গৈছে।
