দীক্ষিতৰ মৃত্যুৰ বাবে কাৰ্বি-ডিমাচা ভৱনৰ আধাৰশিলা স্থাপন কাৰ্যসূচী স্থগিত

ASSAM TIMES POST,দিল্লীৰ পৰা কামৰুল খান: দেশৰ ৰাজধানী নতুন দিল্লীত দেওবাৰে কাৰ্বি আৰু ডিমাচা ভৱনৰ আধাৰশিলা স্থাপন কাৰ্যসূচী স্থগিত ৰাখিবলগীয়া হয়। প্ৰবীণ কংগ্ৰেছ নেত্ৰী আৰু দিল্লীৰ প্ৰাক্তন মুখ্যমন্ত্ৰী শীলা দীক্ষিতৰ দেহাৱসানৰ পৰিপ্ৰেক্ষিততে এই সিদ্ধান্ত গ্ৰহণ কৰা হয়। পূৰ্ব-নিৰ্ধাৰিত কাৰ্যসূচী অনুসৰি দেওবাৰে পুৱাৰে পৰা আধাৰশিলা স্থাপন কৰিবলগীয়া স্থানত যো-জা চলিছিল যদিও অৱশেষত উক্ত কাৰ্যসূচী স্থগিত ৰখাৰ কথা ঘোষণা কৰে স্বায়ত্তশাসিত জিলা সমষ্টিৰ সাংসদ হৰেণ সিং বে’য়ে। প্ৰসংগক্ৰমে দীক্ষিতৰ মৃত্যুৰ পৰিপ্ৰেক্ষিতত দিল্লী চৰকাৰে ঘোষণা কৰা দুদিনীয়া শোক পালনলৈ শ্ৰদ্ধা জনায়েই এই পদক্ষেপ লোৱা হয়। উল্লেখযোগ্য যে এই কাৰ্যসূচীত কেন্দ্ৰীয় গৃহমন্ত্ৰী অমিত শ্বাহে অংশগ্ৰহণ কৰাৰ কথা আছিল।