ASSAM TIMES POST
নিউজ ডেস্ক
বিক্ষোভকাৰীসকলক উদ্দ্যেশ্যি গুলী চলোৱাৰ অভিযোগ পূৰ্বতেই উঠিছিল৷ সেই বিতৰ্কৰ ঢৌ মাৰ নৌযাওঁতেই পুনৰ এবাৰ প্ৰশ্ন উঠিছে উত্তৰ প্ৰদেশ আৰক্ষীৰ ভূমিকাক লৈ৷ এইবাৰ উঠিছে সাম্প্ৰদায়িক মন্তব্যৰ অভিযোগ৷ আৰু এই মন্তব্য উঠিছে মিৰাটৰ খোদ আৰক্ষী অধীক্ষক অখিলেশ নাৰায়ণৰ বিৰুদ্ধে৷ উত্তৰ প্ৰদেশৰ হিংসাত্মক ঘটনাৰ সমান্তৰালভাৱে নাৰায়ণৰ এই মন্তব্যৰ ভিডিঅ’ ভাইৰেল হৈ পৰিছে ছ’চিয়েল মিডিয়াত৷ এতিয়া সেই ভিডিঅ’টোক লৈয়ে সৰৱ চৰ্চা চলিছে ৰাজ্যখনত৷
২ মিনিটৰ কম সময়ৰ ভিডিঅ’টোত কেইবাজনো লোকক দাবী-ধমকি দিয়া দেখা গৈছে আৰক্ষী অধীক্ষকগৰাকীক৷ উল্লেখ্য যে সংশোধিত নাগৰিকত্ব আইনৰ প্ৰতিবাদত বিগত কেইবা দিনো ধৰি উত্তৰ প্ৰদেশত সংঘটিত হৈ আছে হিংঘাত্মক ঘটনা৷ প্ৰতিবাদকাৰী আৰু আৰক্ষীৰ মাজৰ সংঘাতে ৰণক্ষেত্ৰলৈ পৰিণত কৰিছে ৰাজ্যখনৰ কেইবাখনো জিলা৷ যোৱা শুকুৰবাৰে সেই হিংসাত্মক ঘটনাৰ সকলোতকৈ বেছি আঁচোৰ পৰে মিৰাটত৷ ৰাজ্যখনৰ ভিতৰত কেৱল মিৰাটতেই উক্ত দিনা হিংসাত্মক ঘটনাৰ চিকাৰ হয় ৬জনকৈ লোক৷ সেই হিংসাত্মক ঘটনা ৰোধ কৰিবৰ বাবে জিলাখনৰ আৰক্ষী অধীক্ষক অখিলেশ নাৰয়ণৰ নেতৃত্বত আৰক্ষীৰ বিশাল বাহিনী নামি পৰিছিল৷
টহল দিয়াৰ সময়ত আৰক্ষী অধীক্ষকগৰাকী সোমাই পৰিছিল এটা গলিত৷ সেই সময়ত গলিটোত টুপী পৰিহিত কেইবাজনো লোক আছিল৷ হঠাৎ সেই লোককেইজনক উদ্দ্যেশ্যি নাৰায়ণে কয়, “ক’ত পলাবি এতিয়া?” ব্যক্তি কেইজনৰ মাজৰ পৰা এজনে উত্তৰ দিয়ে, “আমি নামাজ পঢ়িবলৈ গৈছিলোঁ৷” উত্তৰত এইবাৰ ধমকৰ সুৰ শুনা যায় আৰক্ষী অধীক্ষকৰ কণ্ঠত৷ তেওঁ কয়, ‘ঠিক আছে, কিন্তু ক’লা আৰু নীলা ৰঙৰ বেজ যাৰ বুকুত লাগি আছে তোমালোকে কৈ দিয়া যাতে তেওঁলোক যেন পাকিস্তানলৈ গুচি যায়৷ কেৱল সিমানতেই ক্ষান্ত নহয় আৰক্ষী অধীক্ষকগৰাকী৷ তেওঁ পুনৰ কয়, “যদি এই দেশত থাকিবলৈ ইচ্ছা নাই, তেতিয়াহ’লে গুচি যোৱা ভাই৷ ইয়াতে থাকিবা, কিন্তু গুণগান গাবা অন্য দেশৰ, এইটো হ’ব নোৱাৰে৷” এইবুলি এছপিগৰাকী কিছুদূৰ আগুৱাই গৈ পুনৰ ঘূৰি আহি কয়, “গলিৰ এটা এটা ঘৰৰ পৰা এজন এজনকৈ জে’লত ভৰাম৷ সকলোকে শেষ কৰি দিম৷”
আৰক্ষী অধীক্ষকগৰাকীৰ এই ভিডিঅ’টোক লৈ এতিয়া বিভিন্ন মহলত সৰৱ চৰ্চা চলিছে৷ অৱশ্যে তেওঁ কিয় এনে কথা ক’লে সেই বিষয়টো স্পষ্ট নহয়৷ কিন্তু তেওঁৰ এনে মন্তব্যক লৈ হতবাক হৈছে বহুতেই৷ ইয়াৰ বিপৰীতে আৰক্ষীৰ তৰফৰ পৰা এই সম্পৰ্কত ব্যাখ্যা আগবঢ়াই কয় যে সেই অঞ্চলটোত যথেষ্টসংখ্যক দুষ্কৃতিকাৰী আছে, যিসকলে পাকিস্তানৰ হৈ বিভিন্ন ধৰণৰ বিবৃতি দি আহিছে৷ সেয়েহে আৰক্ষী সেই স্থানলৈ গৈছিল দুষ্কৃতিকাৰীসকলক বিচাৰি উলিয়াবৰ বাবে৷ আনহাতে, হিংসাৰ সময়ত সেই অঞ্চলৰ পৰা আৰক্ষীক উদ্দ্যশ্যি ব্যাপকভাৱে ইটা আৰু পাথৰ দলিওৱা হৈছিল বুলিও আৰক্ষীয়ে অভিযোগ কৰে৷
