ASSAM TIMES POST
অসমীয়া, ইংৰাজী আৰু হিন্দী ভাষাৰ সংযোজনেৰে
অধিবেশনৰ স্মৃতিগ্ৰন্থ “দয়ানিধি” প্ৰকাশৰ ব্যৱস্থা
অজন্তা তালুকদাৰ, বোকাখাত
উত্তৰ পূৰ্বাঞ্চলৰ সৰ্ববৃহৎ ধৰ্মীয়, সাংস্কৃতিক অনুষ্ঠান শ্ৰীমন্ত শংকৰদেৱ সংঘৰ ৮৯ সংখ্যক বাৰ্ষিক অধিবেশনৰ প্ৰস্তুতি যুদ্ধকালীন গতিৰে আগবাঢ়িছে। আগন্তুক বৰ্ষৰ ৫ ৰ পৰা ৮ ফেব্ৰুৱাৰী লৈ অনুষ্ঠিতব্য এই অধিবেশন গোলাঘাট জিলাৰ কমাৰগাঁৱৰ মহুৰা বৰদিহিঙ্গীয়া পথাৰত “বিশ্ব ঐতিহ্য কাজিৰঙা সমন্বয় ক্ষেত্ৰ” নামাকৰণেৰে উৎসৰ্গিত মূল অধিবেশন থলীত ৰাজ্যখনৰ বিভিন্ন জিলা শাখাৰ ভক্ত সকলে দিন ৰাতি একাকাৰ কৰি সামৰ্থ অনুযায়ী নিজ নিজ সেৱা আগবঢ়াইছে ।
১৮১৭ বিঘা পথাৰ সামৰি আয়োজন কৰা অধিবেশন থলীত এইবাৰ মিচিং জনগোষ্ঠীৰ আৰ্হিৰ চাংঘৰত থাকিব সংঘৰ পদাধিকাৰ আৰু মূল কেন্দ্ৰীয় বিষয়ববীয়া । বিদেশী পৰ্যটকৰ বাবে থাকিব সুকীয়া অতিথি শালা। পাঁচ কিলোমিটাৰ ব্যাসাৰ্ধৰ অধিবেশন থলীৰ নক্সাও সম্পাদকে সংবাদ মাধ্যমৰ আগত দাঙি ধৰে। ৬০ শতাংশ অগ্ৰগতি লাভ কৰা নিৰ্মাণ কাৰ্যৰ অহৰ্নিষে তদাৰক কৰি আছে আদৰণি সমিতিৰ সভাপতি সম্পাদক প্ৰমূখ্যে বিভিন্ন উপ সমিতি সমুহৰ বিষয়ববীয়াই ।
আজি প্ৰচাৰ আৰু জনসংযোগ উপ সমিতিৰ সভাপতি প্ৰদীপ বৰাৰ সভাপতিত্বত অনুষ্ঠিত এক সভাত আদৰণি সমিতিৰ সাধাৰণ সম্পাদক চন্দ্ৰকান্ত ভূঞাই প্ৰস্তুতিৰ খতিয়ান দাঙি ধৰে । অধিবেশনৰ স্মৃতিগ্ৰন্থ “দয়ানিধি” অসমীয়া, ইংৰাজী আৰু হিন্দী ভাষাৰ সংযোজন কৰি প্ৰায় ৫৫০ পৃষ্ঠাৰ, লগতে ভালেকেইখন গৱেষণা মূলক বিষয় সামৰি গ্ৰন্থ প্ৰকাশৰ প্ৰস্তুতি কৰা হৈছে বুলি জানিবলৈ দিছে।
আনহাতে বহুকেইটা প্ৰচাৰ মাধ্যমত ৰাজনৈতিক দল সংগঠন, নেতাৰ পৰা আৰ্থিক অনুদান নোলোৱাৰ প্ৰসংগত আদৰণি সমিতিৰ সভাপতি ধৰ্মেশ্বৰ হাজৰিকাই সংবাদ মেল যোগে শ্ৰীমন্ত শংকৰদেৱ সংঘৰ এই অধিবেশৰ আদৰণি সমিতি বা কেন্দ্ৰীয় সমিতিৰ তৰফৰ পৰা এনে কোনো সিদ্ধান্ত লোৱাৰ কথা অস্বীকাৰ কৰে আৰু অৰাজনৈতিক এই অনুষ্ঠানত সকলো ব্যক্তিৰ সেৱাৰ গুৰুত্ব আছে বুলি উল্লেখ কৰি এনেকুৱা বাতৰি সংঘৰ মজিয়াৰ নহয় বুলি স্পষ্ট কৰি দিয়ে। আজি বহু কেইখন উপ সমিতিৰ বৈঠক অনুষ্ঠিত হয়। আদৰণি সমিতিৰ সভাপতি সম্পাদকে সমূহ ৰাইজৰ আন্তৰিক সহযোগিতা কামনা কৰিছে।
